अनधिकृत बांदकामांः मुख्यमंत्र्यांची आयज महसूल अधिकाऱ्यां कडेन बसका

भांगरभूंय | प्रतिनिधी

-कायद्यांत दुरुस्ती करपा विशीं जातली चर्चा पणजीः गोंयांत अनधिकृत बांदकामां नियमीत करपाचे फाटभुंयेर मुख्यमंत्री डॉ. प्रमोद सावंत बुधवारा सांजवेळा मंत्रालयांत महसूल खात्याच्या अधिकाऱ्यां कडेन बसका घेतले. मंगळारा आमच्या प्रतिनिधी कडेन उलयतना ‘गोंय अनधिकृत बांदकाम नियमन कायदो, 2016’ हातूंत दुरुस्ती करून अनधिकृत बांदकामांचें नियमितीकरण करपा विशीं बसकेंत चर्चा जातली अशी म्हायती सरकारी सूत्रांनी दिली.

अनधिकृत बांदकामां संबंदीं सध्याच्या कायद्यांत दुरुस्ती करून अनधिकृत बांदकामां नियमीत करपाची प्रक्रिया सोंपी जातली अशें मुख्यमंत्री डॉ. प्रमोद सावंत हांणी कांय दिसां आदीं आमच्या प्रतिनिधी कडेन उलयतना सांगिल्लें. ही प्रक्रिया मुखार व्हरपा खातीर बुधवारा मंत्रालयांत महसूल खात्याच्या अधिकाऱ्यां कडेन बसका जातली. ‘गोंय अनधिकृत बांदकाम नियमन कायदो, 2016’ हातूंत दुरुस्ती करून अनियमीत बांदकामांक कायदेशीर करपाचेर आनी हे संबंदी नवो अध्यादेश जारी करून बसकेंत चर्चा जातली अशें सूत्रांनी सांगलें.

गोंयांत स्थायीक जाल्ल्या जायत्या थळाव्या लोकांनी आनी नागरिकांनी बेकायदेशीर रितीन घरां बांदल्यांत. अशीं घरां मोडपाचो आदेश न्यायालयान दिलो जाल्यार हजारांनी नागरिकांक ताचो भार सोंसचो पडटलो. नागरीक परत परत मंत्री आनी आमदार हांचे कडेन वचून हे संबंदीं आपली भिरांत उक्तायतात. ते खातीर सरकारान हे संबंदी सध्याच्या कायद्यांत दुरुस्ती करून अनधिकृत घरां नियमीत करपाचो विचार केला.

मजगतीं, न्यायालयाच्या आदेशा प्रमाण म्हामार्ग आनी जिल्हो पांवड्या वेल्या रस्त्यांच्या कुशीचीं बेकायदो बांदकामां मोडपाची प्रक्रिया सरकारान सुरू केल्या. ते भायर सरकारी जमनींतल्या बेकायदो बांदकामां विशींय बुधवारा जावपी बसकेंत चर्चा जावंक शकता अशें सूत्रांनी सांगलें.

———————

प्रलंबीत कुळ-मुंडकार प्रकरणांचेरूय चर्चा जावप शक्य

महसूल खात्यांत सध्या कुळ, जल्म प्रमाणपत्र, उत्परिवर्तन हांचे संबंदी हजारांनी प्रकरणां प्रलंबीत आसात. तातूंतलीं 1,455 प्रकरणां धा वर्सां प्रलंबीत आसात, जाल्यार 2,655 प्रकरणां पांच वर्सां प्रलंबीत आसात. ह्या प्रकरणांची बेगोबेग सुनावणी घेवन निकालांत काडपाचें निर्देश मुख्यमंत्री डॉ. प्रमोद सावंत परतून दिवपाची शक्यताय आसा.