भांगरभूंय | प्रतिनिधी
टूर ऑपरेटर्सांची मागणी
पणजीः पर्यटन खात्यान नेमां कडेन आडनदर केल्ल्या कारणान बेकायदेशीर गजाली वाडल्यात आनी पॅराग्लायडींग घडणूक हाची गवाय दिता. गोंयांत भायल्या राज्यांतल्यान आयिल्ले वेवसायीक अधिकृत परवानो आनी संबंदीत खात्याचे परवाने घेनासतना पॅराग्लायडींग उपक्रम चलयतात. पर्यटन खात्यान हाचेर खर कारवाय करची अशी मागणी टूर ऑपरेटर्सांनी केल्या.
केरी पॅराग्लायडींक करतना ते जमनीर कोसळून महाराष्ट्राची पर्यटक आनी पॅराग्लायडींगच्या पायलटाक मरण आयिल्ले. हे विशीं कसलचे परवाने घेवंक नाशिल्ल्याचें लक्षांत आयले उपरांत पुलिसांनी पॅराग्लायडींग वेवसाच्या धनयाक अटक केली. हे विशीं टूर ऑपरेटर्सांनी हुस्को उक्तायला.
सगल्यांत पयली हे भायल्या राज्यांतल्यान आयिल्ले पॅराग्लायडींग ऑपरेटर स्वता नितळ आनी कायदेशीर दाखोवन एक आयडी तयार करून वेवसाय चलयतात. ते कायदेशीर आसा अशें समजून कांय ट्रेव्हल एजन्सीं तांची नोंदणी करतात अशी म्हायती टूर ऑपरेटर फोंडू आश्वेकार हांणी दिली.
पॅराग्लायडींग करपा खातीर अडेज ते चार हजार रुपया मेरेन शुल्क घेतात. हांचे ऑनलायन वा ऑफलायन बुकींग करपाक मेळटा. पूण हे घडणूक उपरांत धक्को बसलो आनी कळून आयले की सगले नेम खुटयाळ्याक लावन संबंदीत अधिकाऱ्यांचे परवाने घेनासतना वेवसाय करतात, अशें आश्वेकार हांणी सांगलें.
विमानाच्या पायलटा भशेन लिसेन्स हे पॅ ग्लायडींक उडोवप्यां कडेन आसपाक जाय. ते भायर नागरी उड्डाण खात्याचो परवानो लागता, नौदळाचो हरकत ना दाखलो जाय पडटा. तशेंच जे सुवातेर वेवसाय करतात थयसरल्या थळावे पंचायती कडल्यान परवानो आनी भलयाकी परवानो घेवप गरजेचो आसता. हे सगळे परवाने पॅराग्लायडर धनया कडेन आसा हें तपासप काम पर्यटन खात्याचें. भायल्या कंपनी बरोबर भागिधारी करून हे सुसेगाद धंदो करतात आनी हाचें पर्यटन खात्याक कांयच पडिल्लें ना अशें आश्वेकार हांणी सांगलें.
पॅराशूट, दोरी, हार्नेस हे बऱ्या दर्जाचें आसप हें भोव गरजेचें. पॅराग्लायडींक पळोवपाक गेल्यार हो एक सुरक्षीत खेळ. चुकून केन्नाय वायट घडणुको जातात. पूण हालींच जाल्ले घडणुकेंत दोगां जाणांक मरण येवप ही गंभीर गजाल आसा. 10-15 वर्सा ट्रेव्हल एजन्सींक लिसेन्स मेळप कठीण जातालें. पूण आयज उक्तडार ह्यो बेकायदेशीर गजाली चलतात. पयलींच सोशल मिडियाचेर गोंयची बदनामी चल्ल्या आनी हाचे मुखार ती जावची न्हय हे खातीर हांचेर चाबूक मारप गरेजेचो, अशें आश्वेकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
