भांगरभूंय | प्रतिनिधी
पणजी : नव्या मंत्र्यांक चवथी दिसाच खातीं मेळ्या उपरांत आतां अनंत चतुर्थी उपरांत सभापतीची निवड जातली. सभापतीचे निवडी खातीर विधानसभेचें खासा अधिवेशन आपोवपाचें पडटलें. नांव निश्चीत जाले उपरांत अधिवेशन आपोवपाचो निर्णय सरकार घेतलें, अशी म्हायती गोपांनी दिली.
सभापतीपदा खातीर सांवड्डेंचे आमदार गणेश गांवकार हांचें नांव निश्चीत जालां. मात पक्ष हे विशीं चर्चा करून अधिकृत निर्णय घेतलो. नांवा विशीं अधिकृत निर्णय जाले उपरांत अधिवेशन आपोवपाचो निर्णय जातलो. सभापतीपदा विशीं पक्षान अजून निर्णय घेवंक ना. हो विशय सरकाराच्या अखत्यारींत येता. सरकार वा सत्ताधारी आमदार नांव निश्चीत करपा सयत अधिवेशन आपोवपाचो निर्णय घेतलें. मात पक्षीय पावंड्यार लेगीत नांवा विशीं विचार जातलो, अशी म्हायती प्रदेश भाजप अध्यक्ष दामू नायक हांणी दिली.
वेंचणूक जावन मार्च 2022 त डॉ. प्रमोद सावंत हांच्या फुडारपणा खाला नवें सरकार सत्तेर आयलें. काणकोणचे आमदार रमेश तवडकार हांची सभापतीपदाचेर निवड जाली. म्हापशेंचे आमदार ज्योशुआ डिसोझा हांची उपसभापतीपदाचेर निवड जाली. साडेतीन वर्सां उपरांत गोविंद गावडे हांच्या जाग्यार रमेश तवडकार हांचो मंत्रीमंडळांत आस्पाव जाला. चवथी पयलीं 21 ऑगस्ट ह्या दिसा रमेश तवडकार आनी दिगंबर कामत हांचो मंत्री म्हूण सोपूत विधी जालो. हाचे उपरांत चवथी दिसा दोनूय नव्या मंत्र्यांक खातीं मेळ्ळीं. सभापतीपद रितें आशिल्ल्यान सभापतीपदा विशीं उमळशीक आसा. गणेश गांवकार हांचें नांव निश्चीत जालां आसलें तरीय अधिकृतपणान कोणेंच नांव सांगूक ना. अजून हो विशय आपले मेरेन पावूंक ना. पक्षान लेगीत आपल्याक कल्पना दिवंक ना, अशें गणेश गांवकार हांणी स्पश्ट केलां.
रमेश तवडकार हांच्या राजिनाम्या उपरांत सभापतीपद रितें आसलें तरी लेगीत तें भरपाविशीं कसलेच तरेचे सोपस्कार सुरू जावंक नात. सभापतीपदाचे गैरहाजेरींत उपसभापती सभाघराचें कामकाज चलोवपाक शकता. उपसभापतीच्याच फुडारपणा खाला सभापतीपदाची वेंचणूक जातली. हें पद अमूक दिसांनीच भरपाक जाय, अशें तरेचो कसलोच नेम ना, अशी म्हायती विधानसभा सचीव नम्रता उल्मन हांणी दिली. विधानसभेचें पावसाळी अधिवेशन 8 ऑगस्टाक सोंपलें. 6 म्हयन्यां पयलीं अधिवेशन घेवप गरजेचें आसता. हाका लागून फुडलें अधिवेशन 8 फेब्रुवारी पयलीं घेवचें पडटलें. मात ताचे पयलीं सप्टेंबरांतूच खासा अधिवेशन जावन नव्या सभापतीची निवड जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
