भांगरभूंय | प्रतिनिधी
द्वारकाः रिलायन्स इंडस्ट्रीज लिमिटेडाचे अध्यक्ष मुकेश अंबानी हांचे पूत अनंत अंबानी हांणी काल आयतारा 180 किलोमिटरांची पदयात्रा पूर्ण केली. ते फांतोडेर श्रीद्वारकाधीश देवळांत पावले.
काल रामनमीक तिथी प्रमाण तांचो वाडदीस येता. 10 एप्रीलाक ते आपलो तिसावो वाडदीस हांगाच मनयतले. आपली पदयात्रा सोंपली तेन्ना अनंत हांणी द्वारकाधीशा विशीं उपकार मानले. तांणी सांगलें, ही म्हजी अध्यात्मिक यात्रा आशिल्ली. हांवें देवाचें नांव घेवन ती सुरू केल्ली आनी देवाचें नांव घेवनूच सोंपयली. हांव भगवान द्वारकाधीशाचे उपकार मानता. प्रभू कृष्णाचे आशीर्वाद आनी सनातन धर्माच्या तत्वांक शरण येवपाची ही एक कृती.
अनंत हांणी आपली यात्रा 28 मार्चाक जामनगरांतल्या मोती खावडीच्यान सुरू केल्ली. लोकांची गर्दी, सुरक्षे खातीर चलप कठीण जावपाचें ताका लागून तांणी रातच्या वेळार पदयात्रा पुराय केली. अनंत हांकां ल्हानपणा सावन कशिंग सिंड्रोम आसा. ताचे कडेन ते झुजतात. तांकां मोटसाण, दम्याचेंय आसा. तरीय तांणी ही यात्रा पूर्ण केली, ही तुस्त करपा सारकी गजाल. पूण तांकां ही यात्रा स्वताची शक्त दाखोवपाक नाशिल्ली, तर भंया आड भक्ती, शिस्त दाखोवंक आशिल्ली. यात्रे वेळार हनुमान चालीसा, सुंदरकांड आनी देवी स्त्रोत्राचो जपूय केलो.
पदयात्रेच्या निमण्या दिसा अनंत अंबानी हांचे वांगडा तांची आई नीता आनी घरकान्न राधिका मर्चंट आशिल्ली. एके आवय खातीर ही अभिमानाची गजाल. म्हजो पूत अनंत द्वारकाधीशाच्या ह्या पवित्र थळा मेरेन ही यात्रा पुराय करपाक यसस्वी थारलो, अशें नीता अंबानी हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
