भांगरभूंय | प्रतिनिधी
अनंतपूरम स्पोर्ट्स अकादमीन कॉम्पेशन फुटबॉल अकादमीक 1-0 अशा गोल फरकांनी हारोवन 16 वर्सां पिराये सकयले चलयांची अखील भारतीय आंतर अकादमी ‘लिगसी करंड 2022’ सर्तीचें वस्तादपण जोडलें.
मॅचींतलो एकोडो आनी म्हत्वाचो गोल नंदिनी व्यासपुरमान केलो. रावंड लीग पद्दतीन सर्तीचें आयोजन केल्लें. हाचे आदीं म्हणल्यार ऑगस्ट म्हयन्यांत आंध्र प्रदेशांत जाल्ले इंस्पायर करंड सर्तींत गोंयच्या चलयांनी प्रतिस्पर्धी पंगडाक ह्याच फरकान हारयिल्लो.
महाराष्ट्राच्या धी स्पोडिया स्पोर्ट्स अकादमीक तिसरी आनी तामिळनाडूच्या लायफ स्पोर्ट्स अकादमीक चवथी सुवात फावो जाली.
सर्तीचें आयोजन सोसायटी ऑफ दी डिव्हायन वर्ड (एसव्हीडी) गोवान दुबयच्या पायनीयर स्पोर्ट्स अकादमी आनी गोंयच्या सेझा फुटबॉल अकादमी हांच्या सहकार्यान आयोजीत केल्ली.
इनामां भेटवण सुवाळ्याक मुखेल सोयरे म्हूण एआयएफएफाचे प्रशिक्षण मुखेली सावियो मदैरा उपस्थीत आशिल्ले. तांणी भारताचे आदले आंतरराष्ट्रीय फुटबॉलर फ्रॅंकी बार्रेटो, रितिन्हा परेरा, पायोनीयर स्पोर्ट्स अकादमीचे सीईओ लियोनार्ड फर्नांडीस हांचे उपस्थितींत इनामां भेटयलीं.
हेर वैयक्तीक इनामांः फातिमा ब्रागांझा (गोल्डन बूट, कॉम्पेशन), नंदिनी व्यासपुरम (अनंतपूरम), रिया राजेश (गोल्डन ग्लोव्स, कॉम्पेशन) चंदना (सर्तींतली उत्कृश्ट खेळगडी, अनंतपूरम).
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
