भांगरभूंय | प्रतिनिधी
ज्या नेटान विज्ञानाची उदरगत जाता ते प्रमाणे अध्यात्मीक तत्वां फाटीं पडत वतात. एके वटेन विज्ञान उदरगतीचीं पावलां मारीत वयर- वयर वचत तेंगशेर पावलां तर दुसरे वटेन अध्यात्म तेंच- तेंच पोरणें काळा भायलें तत्वगिन्यान घेवन बसलां. विज्ञान जितलें विकसीत जाता तितलें तें कठीण जायत वता आनी सरसकट मनशाच्या आकलन क्षमतेच्या भायर वता. ते खातीर सरसकट मनीस विज्ञानीक गिन्यानाचो आनंद घेवपाक शकना. पूण, विज्ञानाचे निर्मितीचे चडांत चड भोग घेवपाक मात फुडें येता. हो तांचोय दोश म्हणपाक जायना; कारण मनीसजातीची प्रवृत्ती मुळांत भौतीक वादी आसा. आपलें जिवीत चडांत चड सोंपें जावंचें आनी सुरक्षीत जावंचें होच तर जिविताचो मुखेल उद्देश आसा. घरांत वीज आसतना तेलाचे दिवे कोण पेटयतलो? एक प्रथा म्हणून देवाचें मखर सोबोवपाक तेलाचे दिवे तितले पेटतात. देवळांत उजवाड घालतात ते फकत विजेचेच दिवे!
अध्यात्माची तत्वां देवाच्या मखराची सोब वाडोवपा पुरती उरल्या. अध्यात्म सांगता, तुमकां जें मेळ्ळां तातूंत समाधान मानात. पूण जें कितें हाताक लागलां तातूंत मनशाक समाधान ना म्हणूनच ताका मनशांती मेळना आनी अध्यात्माच्या लागीं वचपाक प्रेरीत जाता. पूण मनशाचे जिणेचे उदरगती खातीर अध्यात्माचें खंयचेंय तत्व उपेगाचें ना.
विज्ञानाचो चडांत चड भोग घेवपी आमचो समाज अध्यात्मीक बाबांच्या जाळ्यांत कसो आडकून पडटा. हेंच तर व्हड अजाप जावन बसलां. ताचे फाटलें एक मुखेल कारण म्हणल्यार अध्यात्माचे विचार समजुपाक बुद्द वापरची पडना. बाबा- बुवांच्या लागीं वचचें पयलीं बुद्द भायर दवरून फकत भक्तीन शरण वचचें असो आग्रो आसता. अध्यात्माचे आभासी विचार आयकतल्यांक समजतात अशें ना. समजले म्हणून ते आचरणांत हाडपाक जाय अशेंय ना. म्हणूनच अध्यात्मांतल्यान (अंध) भक्त तितले निर्माण जातात.
तशेंच दुसरो म्हत्वाचो मुद्दो असो, विज्ञानाचो जल्म पाश्चात्य देशांत जाला आनी अत्यंत प्राचीन आनी प्रगल्भ सभ्यताय आशिल्लो आमचो समाज पाश्चात्य विज्ञान- तंत्रज्ञानाचो आश्रीत जावन बसला, हें मनाक खावपाक लागता. तातूंतल्यान आमच्या समाजांत न्यूनगंड निर्माण जाल्लो आसा. ते खातीर विज्ञानाच्यो चुको दाखोवन आपलें अध्यात्म श्रेश्ठ म्हणून दाखोवपाचे यत्न चालू आसतात.
हो विशय येवपाचें मुखेल कारण म्हणल्यार, हालींच एक व्हिडिओ व्हायरल जाला. व्हिडिओत तशें नवें कांयच ना. फाटल्या अनेक वर्सां सावन समाजांतल्या अर्दकुटे ज्ञानाचो फायदो घेवन समाजांत चुकीची म्हायती पसरावपाचे जे यत्न चल्ल्यात तांतलोच हो एक प्रकार आसा.
व्हिडिओत एक ‘स्वंय-घोषित’ अध्यात्मीक पंडिता म्हणटात, ‘जें आमकां दिसता ताचेरच विज्ञान विश्वास दवरता. जें दिसना ताचें अस्तित्व विज्ञान न्हयकारता. मन आमकां दिसना म्हणजेच विज्ञान मनाचें अस्तित्व मानता.’ आनी फुडें सांगतात. ‘अध्यात्मांत मनाचो अभ्यास जाता.’ हो युक्तिवाद तसो नवो न्हय, अध्यात्माचीं मुळावीं तत्वां ‘मन आनी आत्मो’ ह्याच दोन संकल्पनांचेर आदारून आसात.
विज्ञान मनाचें अस्तित्व मान्य करना, हो चुकीचो निश्कर्श. मन आनी विचार हांचें अस्तित्व कोणच न्हयकारपाक शकनात. पूण विज्ञानान आत्मो ही संकल्पना केन्नाच भायरायल्या. पूण ताचेर विचार हांगा नाका.
मूळ मुद्दो, विज्ञान मनाचें अस्तित्व मानिना आनी अध्यात्म मनाचेर संशोधन करता आनी ताचेर ताबो दवरपाक शिकयता, हें कितलेशें बरोबर आसात, तें पळोवया.
जर मनशाचे मन हें अध्यात्माचें कार्यक्षेत्र आसा, अशें मानून घेतलें तर हजारांनी वर्सांची ही पोरणीं विचारसरणी मनाच्या संशोधनांत कितली फुडें पावल्या हाचो अभ्यास करचो. अध्यात्मांत मनाच्या संशोधना खातीर कसली प्रक्रिया वापरतात. हे विशीं कसलीच म्हायती मेळना. साधना, चिंतन, भजन, नामस्मरण, मनन, ध्यान, साधना ह्या भायर अध्यात्माची नवीन कृती मुखार आयिल्ली दिसना. बरें तातूंतल्यान मनाचेर कितलें संशोधन जालां, हें समजून येना.
जें दिसता ताचेरच विज्ञान अभ्यास करता, हो मुद्दो पुराय चुकीचो आसा. हवा आमकां खंय दिसता? म्हणजें तिचें अस्तित्व न्हयकारप? हवेंत ऑक्सिजन वायू आसा. हें आमकां दिसना. विज्ञानांत अनेक प्रयोग करून ताचें अस्तित्व सिद्ध केलां. ताचे बगर मनीस आनी जीवप्राणी जगूंक शकनात हेंय विज्ञानानच सिद्ध केलां.
विज्ञान मनाच्या बाबतींत कितें सांगता, हाचो विचार करुया: खंयचेंय मशीन वा यंत्र चलपाक उर्जा लागता. देखीक फॅन चलपाक वीज लागता. वीज हें उर्जेंचे एक रूप आसा. उर्जा आमकां दिसता व्हय? उर्जेची व्याख्या करतना विज्ञान सांगता, ‘जी काम करता, काम म्हणजेच भौतीक क्रिया करता ती उर्जा.’ मन हे मेंदूचें काम आसा. जशें एक मशीन उर्जा पुरयतकच काम करता. तेच तरेन मेंदूची रचना आनी जैव- रसायनिक क्रिया हांचेर मन आदारून आसता, ते खातीर मेंदूच्या रचनेत वा कामाच्या प्रक्रियेंत थोडोतरी इबाड जालो तर मनशाच्या वागणुकीचेर परिणाम जाता. ताचेय फुडें वचून विज्ञानान मेंदूचें कार्य कशें चलता हें शिकपाक खाशेली यंत्रणा निर्माण केल्या. मेंदूतल्यान तयार जावपी विजेच्यो सुक्ष्मीम लहरी यंत्राचेर घेवन ताचेर संशोधन करता. ताचे भायर वचून मानसोपचार शास्त्र इतलें फुडें पावलां की वैजकी शास्त्राचो तो एक स्वतंत्र फांटो जाला. ते खातीर वेगळी हॉस्पिटलां आसता. ताचे उरफाटें अध्यात्माचें कार्यक्षेत्र भक्ती, भावना, प्रार्थना इतलें पुरतेंच रावलां.
अध्यात्म मनाचेर ताबो दवरता हें खंयच्या अर्थान म्हणटात, हें समजना. आमी देवा कडेन शरण वचून कितें मागतात? बारीकसाणीन विचार करचो. दर एकटो सगले तरेच्या भौतीक सुखाची याचना करता. अध्यात्मीक जिणेशैलीचो प्रचार करपी गुरू तर आलिशान मोटारींनी भोंवतात. एसी मठांत (भवन) रावतात. सगल्या आधुनीक विज्ञानीक यंत्रणेचो लाव घेवपाक तेच फुडें आसतात. तेन्ना मनाचेर ताबो दवरपाक अध्यात्माचें कार्य कितें म्हणपाचें?
विज्ञान मनाच्या संशोधनाचेर दिसानदीस उजवाड घालीत आसा. अध्यात्माचें मन एक मूर्त जावन मखरांत बसून रावलां.
विज्ञानदूत श्रीकांत शंभू नागवेंकार
9096512359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
