भांगरभूंय | प्रतिनिधी
एके वाटेन रोजगार मेळना म्हूण बेरोजगार तरणाटे खंतीन आसात तर दुसरे कडे काम करात ना जाल्यार कर्मचाऱ्यांक घरा बसचे पडतलें अशी शिटकावणी एका सरकारी परिपत्रकाच्या वरवीं दिल्या. थळाव्या पोस्टमनांक अचकीत कामा वेल्यान काडून थंय राज्या भायल्या लोकांक घेतल्यात, अशी बातमी लेगीत चर्चेक आयल्या. हाका लागून आमी एक चितपाक जाय की नोकरी जर आपूण मेळयली, तर ती तिगोवपाचें काम आपलेंच आसा. आनी जर तुमकां एखादे नोकरे वेल्यान काडून उडयलें जाल्यार दुसरे नोकरेची वेवस्था करपाक आपले कडे पात्रताय आसपाक जाय. बरेच वेळा आमकां दिसता की जी नोकरी आपल्याक मेळ्ळ्या तातून आपणे समाधानी रावचें. खरें तर तुमी एखादो कोर्स नाजाल्यार एखादो पदवी अभ्यासक्रम पुराय करून आपले पात्रतायेन भर घालीत रावची. हे पिरायेचो असो उपेग करचो. गेल्ले नोकरेची खंत करपा सारखी स्थिती येवंक दिवची न्हय. आतां नोकरी मेळप दिसान दीस कठीण जावपाक लागलां. हाका लागून तुमकां लेगीत ह्या बदला खातीर आपुणूय बदल करचो अशे दिसूंक जाय.
म्हाका याद आसा, काय तरणाटे रातपाळी करपाक इत्सुक नासतात. फकत पगाराचेर तांचो (आनी हेर कांय जाणांचो) दोळो आसता. हाका लागून ते नोकरेची संद वगडायतात. आतां हे फुडें तर मेळटा त्या पगारांत काम करपाची संवय लावन घेवची पडटली. तशेंच अणभव मेळचो म्हूण पगारा शिवाय काम करपाचो अणभव लेगीत उपेगी पडूं शकता. जशी आमचे कडे स्वेत्सा निवृत्ती आसता तशी ही स्वेत्सा सेवा म्हणू येता. जायत्या व्हड देवळांनी जावं वा व्हड संस्थांनी अशी स्वेत्सा सेवा दिवपी लोक दिसतात. अर्थान तांकां पयशांची गरज नासता. पूण अणभवा खातीर तुमकां अशी संद घेवपाक जाय. गोंय सरकारान गोंयां भितर आयआयटी, एनआयटी, आंतरराष्ट्रीय कायदो कॉलेज, फॉरेन्सिक शिक्षण घेवपाची तजवीज केली, ताचे फाटल्यान तांचो उद्देश स्पष्ट आसा. थळाव्या विद्यार्थ्यांनी हेर फाट्यांचो लेगीत विचार करचो. शिक्षणाचो थर वाडचो म्हूण कोडिंग, रोबोटिक्स सारके विशय शाळांनी सुरु केल्यात. ताचोच एक भाग म्हळ्यार अभियान नांवाचें बिगर सरकारी संस्थेन सरकारी माणकुलीं भुरगीं शिकतात, त्या प्राथमिक तशेच माध्यमिक शाळांनी कांय उपक्रम चालीक लायल्यात.
करियरा सारक्या विशयांत तुमचे मदीं कसली कुशळटाय जाय, तशेंच त्या- त्या फाट्यांतल्या नामनेच्या मनशांक निमंत्रित करून विद्यार्थ्यां फुडें तांकां उलोवपाक लावप, प्राथमिक शाळेच्या विद्यार्थ्यां मुखार एखादी गजाल वाचून दाखोवप ह्या सारखे उपक्रम आसात. ताचे खातीर तांकां लोकांची गरज आसा. तुमी तुमच्याच वाठारांतले प्राथमिक शाळेंत सप्तकांतल्यान अर्द वर दोन फावट दिवन मजत करूं शकतात. हांचे खातीर तुमकां स्वेत्सा सेवा दिवची पडटली. तुमी वाचलां आसतलेंच की सांग्या वेलो प्रेमानंद रेकडो हो तरणाटो वालकणी कॉलनी नं 1 मुळाव्या शाळेंतल्या माणकुल्यांक शिकोवपाक आपुण जावन वता. ते शाळेन भुरग्यांक शिकोवपाक शिक्षक नाशिल्ल्यान गावकारांचे विनवणेक मान दिवन तो हें व्हड काम करता. ताका पयशे मेळचे नात, पूण मोलादीक अणभव मेळटलो. खेरीज ताचो आत्मविस्वास वाडटलोच, वयर हांवें विद्यार्थ्यां खातीर कितें तरी केलें, ही भावना ताका निश्चितच उपेगी पडटली. आमी म्हणटात, करी मनोरंजन जो मुलांचे, जडेल नाते प्रभूशी तयाचे, प्रेमानंदा सारके तुमी लेगीत काम करूं शकतात.
गोंयांत शिक्षणाच्या मळार अध्ययन फावंडेशन सरकारी शाळांच्या माणकुल्या भुरग्यां खातीर व्हड आवाजान काणी सांगपा खातीर वेळ दिवपी मनीस सोदतात. ही संद तुमी घेवची आनी तुमच्या लागींच्या शाळेंत सप्तकान एक वर भुरग्यां खातीर दिवचें. चड म्हायती खातीर तुमी मंजिता 7083260581 नाजाल्यार स्टेफी 7517 529578 हांचे कडेन संपर्क करचो. तुमी अध्ययनाच्या संकेतस्थळाक भेट दिवन तांच्या वावराची चड म्हायती घेवं शकतात. संकेतस्थळ आसा www.adhyayanfoundation.org
अशा उपक्रमांतल्यान तुमी दुसऱ्यांक शिक्षण दितना तुमचो आत्मविस्वास वाडयतले, हातूंत दुबाव ना.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
