भांगरभूंय | प्रतिनिधी
-आमदार, मंडळ अध्यक्षां कडेन संपर्क सादपाक सुरवातपणजी : मंडळ अध्यक्षांच्या निवडीची प्रक्रिया सुरू आसतानाच प्रदेश भाजप अध्यक्षपदा खातीर इत्सूक आशिल्ल्या फुडाऱ्यां कडल्यान मोर्चेबांदणी सुरू जाल्या. मंडळ अध्यक्षांच्या वेंचणुकेक हजेरी लावन नव्यान वेंचून आयिल्ल्या मंडळ अध्यक्षां कडेन चर्चा करपाक इत्सुकांनी सुरवात केल्या.
भारतीय जनता पक्षाच्या मंडळ अध्यक्षांची निवड शेनवार आनी आयतार अशें दोन दीस जातली. शेनवारा मुरगांव, फातोड्डें, दाबोळी ह्या मतदारसंघांतल्या अध्यक्षांची निवड जाली. मुरगांवचे आमदार संकल्प आमोणकार हांचें विश्वासांतले अविनाश नायक हे मुरगांव मंडळाचे अध्यक्ष जाले. तशेंच दाबोळी मंडळाचेर येरादारी मंत्री मॉवीन गुदिन्हो हांचे समर्थक सचीन चौगुले हांची निवड जाल्या. श्वेता लोटलीकार ह्यो फातोड्डें मंडळाच्यो अध्यक्ष जाल्याे. फोतोड्डें भाजप मंडळ अध्यक्षाच्या वेंचणुके वेळार मडगांवचे आमदार दिगंबर कामत, दामू नायक तशेंच बाबू कवळेंकार हाजीर आशिल्ले. हेर मतदारसंघांतल्या मंडळ अध्यक्षांची निवड आयज आयतारा जातली. सगळ्या मतदारसंंघांतल्या मंडळ अध्यक्षांची निवड 7 जानेवारी मेरेन जातली. मंडळ अध्यक्षांची निवड जाले उपरांत जिल्हो अध्यक्षांची निवड जातली. ही प्रक्रिया पुराय जाले उपरांत प्रदेश अध्यक्षांची निवडीची प्रक्रिया सुरू जातली. पक्षाचे आमदार, मुख्यमंत्री आनी सुकाणू समिती कडेन चर्चा करून केंद्रीय फुडारी अध्यक्षपदाचें नांव निश्चीत करतले.
प्रदेश अध्यक्षपदा खातीर चंद्रकांत कवळेंकार, दामू नायक, अॅड. नरेंद्र सावयकार, दिलीप परूळेकार, दयानंद मांद्रेंकार आनी दयानंद सोपटे ही नांवां पक्षान दिल्ली धाडल्या. ह्या सगळ्या इत्सुकांनी आपआपल्या परीन अध्यक्षपद मेळोवपा खातीर यत्न सुरू केल्यात. हाका लागून सगळ्या इत्सुकांची मंडळ अध्यक्षपदाच्या वेंचणुकेक हजेरी आशिल्ली. मंडळ अध्यक्ष कोण जाता, हाचे कडेन सगळ्यांचे लक्ष आसा.
आयज मेरेन प्रदेश भाजप अध्यक्षपदा खातीर केन्नाच वेंचणूक जावंक ना. ती सेगीत विरोधाविणें जाल्या. थळाव्या फुडऱ्यां कडेन चर्चा करून केंद्रीय फुडारी नांव निश्चीत करता. वेंचणुके वेळार नांव निश्चीत केल्ली व्यक्ती अर्ज भरता. हेर कोण अर्ज भरिना. हाका लागून निवड विरोधाविणें जाता. अध्यक्षपदाचेर हांवें पयलीच दावो केला. केंद्रीय फुडाऱ्यां कडेन लेगीत चर्चा केल्या, अशें दिलीप परूळेकार हांणी सांगलें.
————–
भाजपाचे राष्ट्रीय सरचिटणीस अरूण सिंह येतले गोंयांत
मंडळ अध्यक्ष वेंचणुकेचो नियाळ घेवन चर्चा करपा खातीर भाजपचे राष्ट्रीय सरचिटणीस अरूण सिंह हे आयज वा फाल्यां गोंयांत येतले. चर्चा करून ते पक्षाक अहवाल सादर करतले. विधानसभा वेंचणुकेचेर नदर दवरून समर्थकाची वर्णी मंडळ अध्यक्षपदाचेर लावपाचे आमदारांचे यत्न आसात. ह्या यत्नाक आमदारांक बरे तरेन येस आयलां. प्रदेश अध्यक्षपदा खातीर आमदार तशेंच मंडळ अध्यक्षांचो तेंको फावोसो थारतलो. हाका लागून प्रदेश अध्यक्ष सदानंद तानावडे तशेंच आमदारां सयत अध्यक्षपदा खातीर इत्सूक आशिल्ल्यांनी लेगीत मंडळाच्या वेंचणुकेंत हजेरी लावपाचे सत्र आपणायलां. चंद्रकांत कवळेंकार, दामू नायक हांणी शेनवारा बऱ्याच फुडाऱ्यांनी हाजेरी लायिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
