भांगरभूंय | प्रतिनिधी
कामकाज सल्लागार समितीची मंगळारा बसका
पणजी : फुडल्या सप्तका सावन सुरू जावपी विधानसभा अधिवेशनाचें कामकाज थारावपा खातीर फाल्यां मंगळारा कामकाज सल्लागार समितीची बसका जातली. ही बसका मंगळारा विधानसभा संकुलांत जातली, अशी म्हायती विधीमंडळ सचीव नम्रता उल्मन हांणी दिली. अधिवेशना खातीर १७८ तारांकीत आनी ५५३ अतारांकीत मेळून ७३१ प्रस्नांच्यो नोटिसो आयल्यात.
सभापती गणेश गांवकार हांच्या फुडारपणा खाला जावपी बसकेक मुख्यमंत्री डॉ. प्रमोद सावंत, विरोधी पक्ष फुडारी युरी आलेमाव, आरजीचे विरेश बोरकार, गोवा फॉरवर्डाचे विजय सरदेसाय तशेंच कामकाज सल्लागार समितीचे हेर वांगडी हाजीर आसतले. अधिवेशनांत प्रस्नोत्तरासयत सरकारी विधेयकां, खासगी थाराव, झीरो आवर उल्लेख, लक्षवेधी सुचोवण्यांक कितलो वेळ दिवचो हाचेर चर्चा जातली. अधिवेशन १२ जानेवारी ते १६ जानेवारी मेरेन चलतलें. पयले दिसा राज्यपालांचें अभिभाशण जातलें. शुक्रारचो निमणो दीस हो खासगी कामकाजाचो दीस आसतलो.
सगल्या विरोधकांनी एकठांय येवन सरकाराक घेरपाचो निर्णय जाहीर केला. बर्च घडणूक, म्हापशें आनी बायणाचे दरोडे हाका लागून सरकाराक अधिवेशनांत धरतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
