भांगरभूंय | प्रतिनिधी
पणजी : पावसाळी अधिवेशनाचें कामकाज थारावपा खातीर कामकाज सल्लागार समितीची बसका फाल्यां 7 जुलयाक सकाळीं विधानभवनांत जातली. पावसाळी अधिवेशन 21 जुलय ते 8 ऑगस्ट मजगतीं जातलें. सभापती रमेश तवडकार हांचे अध्यक्षते खाला फाल्यां बसका जातली, अशी म्हायती विधानसभा सचिव नम्रता उल्मन हांणी दिली.
अधिवेशना खातीर आमदारां कडल्यान प्रस्न स्विकारपाक सुरवात जाल्या. 15 जुलय मेरेन अधिवेशना खातीर प्रस्न स्विकारतले. अधिवेशना खातीर येवपी सरकारी विधेयकां आजूनय निश्चीत जावपाचीं आसात. अधिवेशन 15 दिसांचें आतलें. शुक्रारचो दीस हो खासगी कामकाजाचो दीस आसतलो. एका दिसा कितल्यो लक्षवेधी सुचवण्यो चर्चेक घेवच्यो, झीरो आवर कितलें येवप हाचेर कामकाज सल्लागार समितीचे बसकेक चर्चा जातली. अधिवेशन आदले प्रमाणे सकाळीं 11.30 वरांचेर सुरू जातलें. प्रस्न जापेचें सत्र जाले उपरांत झिरो आवर आनी लक्षवेधी सुचवण्यांचेर चर्चा जातल्यो. दनपार मेरेन चर्चा आनी खात्यांच्या मागण्यांक मंजुरी मेळटली, अशी म्हायती विधानसभा सचिव नम्रता उल्मन हांणी दिली.
फाटल्या वर्साचें पावसाळी अधिवेशन 18 दिसांचें आशिल्लें. अंदूं तें 15 दिसांचें आशिल्ल्यान विरोधी कॉंग्रेस पक्षा सयत गोवा फॉरवर्ड आनी आरजी ह्या विरोधी पक्षांनी कालावधी विशीं टिका केल्या. विधानसभेंतली रणनिती थारोवपा खातीर ह्यान पयलींच कॉंग्रेस विधीमंडळ गटाची बसका जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
