भांगरभूंय | प्रतिनिधी
२६ मार्चाक अर्थसंकल्प
पणजी : मडगांवचें कथीत बलात्कार प्रकरण, विद्यापीठांतलें कथीत गुणवाढ प्रकरण, उड्डाणपुला खातीर खाप्रेश्वर मंदीर मोडपाचे फाटभूंयेर फाल्यां सावन अर्थसंकल्पीय अधिवेशन सुरू जावपी वादळी थारपाची शक्यताय आसा. उण्या काळाच्या अधिवेशनांत सरकाराक उक्ताडार हाडपाक विरोधक तयार आसतले. तशेंच विवीध प्रस्न आनी समस्यांच्यो जापो दितना सरकाराची कसोटी लागतले. सरकारा वतीन उद्या तीन दुरूस्ती विधेयकां सादर केल्लीं.
फाल्यां सोमारा पयल्या दिसा प्रश्नोत्तराच्या सत्रा उपरांत मरण आयिल्ल्यांक सभाघरांत आर्गां ओंपतले. आदले आमदार लवू मामलेदार, गोमंत विभूशण पुरस्कारान सन्मानीत जाल्ले स. प्रभाकर कारेकार, अयोध्येंतले राम मंदीराचे मुखेली पुजारी आचार्य सत्येंद्र दास हांचे सयत हेरांक आर्गां ओंपतले. परबीं दिवपाच्या प्रस्तावा उपरांत सभाघरांत विवीध तरेचे अहवाल सादर करतले.
अधिवेशनाच्या पयल्या दोन दिसांनी जेवणा उपरांत राज्यपालांच्या अभिभाशणाचेर चर्चा जातली. तिसर्या दिसा २६ मार्चाक मुख्यमंत्री डॉ. प्रमोद सावंत हे २०२५ – २६ वर्साचो अर्थसंकल्प सादर करतले.
सोमारा तीन दुरूस्ती विधेयका सादर करतले. मुख्यमंत्री डॉ. प्रमोद सावंत हे गोंय राज्य संशोधन फावंडेशन दुरूस्ती विधेयक तशेंच खाजगी विद्यापीठ दुरूस्ती विधेयक सभाघरांत सादर करतले. मजुर आनी रोजगार मंत्री बाबूश मोन्सेरात हे रोजगार विनिमय (खासगी नोकरींची अधिसुचवणी) दुरूस्ती विधेयक २०२५ सादर करतले. खासगी कंपनींनी रोजगार विनिमय केंद्राक भरती करपी नोकर्यांची म्हायती दिवंक ना जाल्यार दंडाची तरतूद ह्या विधेयकांत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
