भांगरभूंय | प्रतिनिधी
मुख्यमंत्री : सरकारी अधिकारी जनतेचे सेवक, मंत्री – वरिश्ठांचे न्हय
भांगरभूंय । प्रतिनिधी
पणजी : आयएएस वा खंयचोय सरकारी अधिकारी आसूं, ताचे कडेन मंत्री वा वरिश्ठांक ना म्हणपाचें धाडस आसपाक जाय. नेम वा कायदो असो आसा. नेमांत नाशिल्ल्या तुजा आदेशाक पाळो दिवप शक्य जावचें ना, अशें ताणें स्पश्टपणान सांगपाक जाय. आपले हितसंबंद सांबाळपा खातीर मंत्री वा वरिश्ठ सांगतात म्हूण ती गजाल करपाक जायना, अशें मत सरकारी अधिकाऱ्यांनी उक्तायलां. कायद्या कडेन तशेंच जनते कडेन सरकारी अधिकाऱ्यांनी प्रामाणीक आसपाक जाय. मंत्री वा वरिश्ठां कडेन प्रामाणीक आसपाची गरज ना, अशेंय तांणी सांगलें.
बर्च बाय रोमिओ लेन क्लबाक फाटल्या शेनवारा उजो लागून 25 जाणाक मरण आयिल्लें. हे दुर्घटणेची दंडाधिकाऱ्या वरवीं चवकशी सुरू आसा. चवकशी सुरू जावचे पयलीं सरकारान तेन्नाची पंचायत संचालक सिद्धी हळर्णकार आनी प्रदुशण नियंत्रण मंडळाची तेन्नाची वांगडी सचीव शमिला मोंतेरो हांकां निलंबीत केल्यात. हे भायर हडफडें – नागवा पंचायतीचे तेन्नाचे सचीव रघुवीर बागकार हाका लेगीत निलंबीत केला. ह्या तिगांची चवकशी सुरू आसा. दंडाधिकाऱ्यांनी चवकशी अहवाल दिले उपरांत आनिकूय सरकारी अधिकाऱ्यांची चवकशी जातली, अशें संकेत मुख्यमंत्री डॉ. प्रमोद सावंत हांणी दिल्यात.
नायट क्लब, हॉटेल वा रेस्टॉरंण्ट चलोवपा खातीर विवीध खात्यां कडल्यान परवाने घेवचे पडटात. संबंदीत खात्याच्या अधिकाऱ्यांनी तपासणी करून तशेंच कागदपत्रांची छाननी करून परवाने दिवपाक जाय. उजो पालोवपी यंत्रणे खातीर उजो पालोवपी दळ, बांदकामाच्या दर्जा खातीर भौशीक बांदकाम खातें, इलेक्ट्रीकल वायरिंगा खातीर वीज खातें, सोरो विकपाच्या परवान्या खातीर अबकारी खातें, प्रदुशण प्रमाण मर्यादीत आसपा खातीर प्रदुशण नियंत्रण मंडळ जापसालदार आसा. ह्या सगल्या खात्याच्या संबंदीत अधिकाऱ्यांनी तपासणी करून परवाने दिवपाक जाय. इलेक्ट्रीकल वायरींग सारकें नासत जाल्यार जोडणी खातीरचो अर्ज भायर मारप वा जोडणी तोडपाचे अधिकार वीज खात्याक आसात. तीच गजाल सोरो विकप, प्रदुशण, उजो पालोवपी दळाच्या अधिकाऱ्यांक लागू जाता. चवकशी उपरांत खंयच्या खात्यान तपासणी करून परवाने दिल्यात वा दिवंक ना, ती गजाल स्पश्ट जातली. एकाद्या खात्याच्या अधिकाऱ्यान तपासणी करिनासतना वा कागदपत्रांची छाननी करिनासतना परवानो दिला आसत, जाल्यार तो कसो दिलो? असो प्रस्न येता. मंत्र्यान सांगलो वा वरिश्ठान सांगलो म्हूण दिलो, अशें तो म्हणपाक शकना. तो दोशी थारता आनी कायद्या प्रमाण ताचेर कारवाय जाता. तो आयएएस, आयपीएस वा वरिश्ठ नागरी सेवा अधिकारी आसलो तरी कायद्या प्रमाण ताका संरक्षण मेळपाक शकना, अशें वीज खात्याचे अभियंते काशिनाथ शेट्ये हांणी सांगलें.
कोण तरी मंत्री वा आमदार सांगता म्हूण हे परवाने दितात आनी लोकांचो जीव वता, जाल्यार अशा अधिकाऱ्यांचेर कारवाय जावपाक जाय. सरकारी अधिकारी हे सरकार तशेंच जनतेचे सेवक आसतात. मंत्री, आमदार वा वरिश्ठांचे नासतात, अशें अभियंते काशिनाथ शेट्ये हांणी सांगलें.
मुख्यमंत्री, मंत्री हांचे आदेश अयोग्य आशिल्ल्यान करिना अशें सांगपाचें धाडस लेगीत दाखोवपी बरेच अधिकारी आसात. हाचे खातीर तांची बदली जाल्या वा हेर त्रास जाल्यात. तरी लेगीत प्रामाणिकपणा वा सेवे विशींची निश्ठा तांणी सोडली ना, अशें निवृत्त नागरी सेवा अधिकारी एल्वीस गोमीस हांणी सांगलें.
2018 वर्सा एका आयएएस जिल्हाधिकाऱ्यान तेन्नाच्या आमदाराच्या आस्थापनाक एक्झीट दार सारकें ना, म्हूण परवानो न्हयकारिल्लो. तेन्नाचे मुख्यमंत्री सर्गेस्त मनोहर पर्रीकार हांणी संबंदीत जिल्होधिकाऱ्या कडेन उलोवन परवानो दिवपा विशीं शिफारस केल्ली. कायद्याक धरून नाशिल्ल्यान ना म्हणपाचें धाडस आयएएस अधिकाऱ्यान दाखयिल्लें. पर्यटन संचालक, बंदर कप्तान, नगरपालिका प्रशासन संचालक, म्हापालिका आयुक्त अश्या विवीध पदांचेर सरकारी सेवेंत आसतना हांवें वावर केला. चेपण येतालें, तरी लेगीत कायद्यांत बसना, तेन्ना हांवें ना म्हणलां. हाचो म्हाका मार लेगीत बसला, अशें निवृत्त अधिकारी एल्वीस गोम्स हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
