अधिकारांतल्यान अस्तुरी नीत

भांगरभूंय | प्रतिनिधी

राश्ट्रीय महिला आयोगाची बांदावळ करतना दवरिल्ली मोख पुराय जायत आयल्या, कायदेय जाल्यात, गरज आसा कायदे चालीक लागपाची. पुण्यांत जाल्ली बलात्काराचे घडणुकेचेर राज्य महिला आयोग, राश्ट्रीय महिला आयोगान विचारवंतां कडेन भासाभास करून नव्यो शिफारशी करच्यो पडटल्यो.

राश्ट्रीय महिला आयोगाची बांदावळ 1992 वर्सा देश पावंड्यार जाली. कायद्याचे फास्केंत आशिल्लो आयोग 25 वर्सां पुराय करतना आयोगाक चड अधिकार मेळपाची मोख आयोगा मुखार आसची पडटली.
ते खातीर वर्सभर भासाभास देश, विदेश पावंड्यार जावची. अस्तुरेक अधिकार, हक्क कायद्यान मेळ्ळे तरी ते चालीक लागपाक वर्सांची वर्सां वतात. अमेरिकेंतल्या रस्त्यांची तुळा अभिनेत्री, खासदार हेमामालिनी हांच्या गालां कडेन करपी आदले केंद्रीयमंत्री लालूप्रसाद यादवांचे दीस सरले. दिल्लीचे हालींच जाल्ले विधानसभा वेंचणुकेंत शिकिल्ले सवरील्ले आदवोगाद रमेश बिधुरी हांचें अस्तुरे विशीं मारिल्ले थोमणें, तातूंतल्यान जाल्लो बोवाळ तांचें जैत पयसावपाक पुरो आशिल्लो. नाका तेन्ना नाका आशिल्ले कडेन अस्तुरेची तुळा करप, तिका थोमणें मारपाचेर राश्ट्रीय अस्तुरी आयोग मदीं पडूंक लागला.
33 टक्के अस्तुरी राखीवता पुरायपणान चालीक लागचे आदीं वेंचणुकेंत अस्तुरीनीत आसची हेखातीर राश्ट्रीय अस्तुरी आयोग एक राष्ट्र एक वेंचणुके खातीर सुरु जाल्ले भासाभाशेंत वांटो घेवन शिफारस करतलो अशी आस्त बाळगुया. राश्ट्रपती द्रौपदी मुर्मु हांच्या संसदेंतल्या भाशणाचेर खासदार सोनिया गांधी अकस्मात उलयल्यो तेन्ना बोवाळ जालो. खासदार प्रियांकां गांधी हांणी सोनियाजींच्या पिरायेची याद तेन्ना करुन दिली. आदले खासदार रमेश बिधुरी हांचीय पिराय मतींत घेतल्यार मनीस पिरायेची
साठी लागीं येतना उत्स्फुर्तपणान उलयतना, व्हिडिओंतल्यान विचार मांडटना तिडक हाडपी उतरां तोंडांतल्यान भायर सरतात. सोशल मिडीया, मीडीयाच्या शस्त्राचो बरो, सकारात्मक उपेग जावचेबदला मीडीया ताचो कोणांकय (मुखेल करुन ज्येश्ठांक) त्रासांत घालपापासत वापर करता, अस्तुरेआड उलोवपाक लायता जाल्यार त्या घडणुकां विशीं अस्तुरी आयोगान विचार करप समा जातलें. तेखातीर संहिता, नेमावळ, नीत तयार जावपाची गरज आसा.
राश्ट्रीय महिला आयोगाची बांदावळ करतना दवरिल्ली मोख पुराय जायत आयल्या, कायदेय जाल्यात, गरज आसा कायदे चालीक लागपाची. पुण्यांत जाल्ली बलात्काराचे घडणुकेचेर राज्य महिला आयोग, राश्ट्रीय महिला आयोगान विचारवंतां कडेन भासाभास करून नव्यो शिफारशी करच्यो पडटल्यो. भारताचे आदले कायदे बदलतात तेन्ना पुणे, कोलकातावरी घडणुकांचेर अभ्यास करुन बलात्कारी बंदखणींतल्यान भायर येवचेना हेखातीर तजवीज करपाचो वगत आयला.
तेपासत महिला आयोगाची शीम कायद्यान व्हड करप, कायद्याचें बळगें आयोगाक मेळप, आयोग फकत शिफारशी करपी न्हय जाल्यार न्यायीक अधिकार आसपी आयोग जावंचो हेखातीर अस्तुरीनीत बांदची पडटली. महिला आयोग बांदावळींत वांटेकार आशिल्ल्यो महाराष्ट्र विधान परिशदेच्यो उपाध्यक्ष डॉ. नीलम गोऱ्हे ज्येश्ठत्वाचे वाटेर आसतना सरकारांत पावल्यो वेंचणुकेत देवन. महिला आयोग, आयोगाची नीत, आयोगाच्या कायद्याचे बांदावळीचे भासाभासेंत वांटेकार जातना डॉ. गोऱ्हे वर्सांची वर्सां विदेसांतल्या परिशदांनी सामील जावपी. गोंयांवरी राज्यांनी महिला आयोग जावचो हेखातीर त्यो वावुरपी.
राष्ट्रकुल परिशदांच्यो शिफारशी भारतांत कितल्यो चालीक लागल्यात ? तांचो लाव, लुकसाण कितलें जालां? अस्तुरेचे हक मनीस हक म्हणून मानून घेवपी विचार लोकां मेरेन पावोवपाक जाल्ले चळवळीन कितलें जैत मेळयलां? अस्तुरेक बळिश्ट करपापासत केल्ल्यो येवजणी कितल्यो जैतवंत जाल्यात? लखपती दीदी सदां लखपती उरतली, ती करोडपती जातली हेखातीर फुडाराची नीत ठरोवपाची गरज आसा.
बेटी बचाओ, सुकन्या, लाडली बहना, लाडली लक्ष्मी, महिला समृद्धी येवजणीतल्यान जाल्ले बदल अस्तुरेक बळगें दिवपी आसात. तांचो नियाळ करुन अर्थिक तजवीज वाडोवपापासत, देस पावंड्यावयल्यो येवजणी बदलांतल्यान सगल्या राज्यांनी आपणावपासत कायदे, नीत जाय. सैमीक अरिश्टां अकस्मात येतात तेन्ना अरिश्ट वेवस्थापन येवजणेतल्यान रोखडी मजत लोकांमेरेन पावोवपाची नीत आसची पडटली. अरिश्टां, तंटे, हुंवार, दुकळाच्या तेंपार सगल्यांत चड जांच जातात ते अस्तुरेक. तेच नदरेंतल्यान अस्तुरीनीत आसची.
कुटुंब न्यायालयां, बाल न्यायालयां आयोगाचे शिमेत आसलीं तरी तांकां अधिकारांतल्यान घटमूट करपापासत भासाभास सुरु जावची. तांच्यो शिमो तालुको ते राज्य पावंड्या मेरेन वाडोवप लावाचें जातलें? कितें आसा स्थिती बाल न्यायालयांची? वेगळें बालक कल्याण खातें जाय? आंगणवाडी कालची, आतांची कशी चलता, आंगणवाडीची मोख बदलता? अभ्यास केल्यार नवें सत मुखार येतलें. आंगणवाडी कामगारांच्या वावरांतल्यान साथीचीं दुयेंसा आळाबंदा हाडप, कुटुंब नियोजनावरी कार्यावळी जैतवंत जाल्यात. आंगणवाड्यांक फुडारांत जागृतायेच्या वावरांत व्हरप शक्य आसा? आंगणवाड्यो आनी आंगणवाडी कर्मचाऱ्यांचे स्थितीचो नियाळ जाला? आंगणवाड्यां पासत वेगळी नेमावळ, नीत करप गरजेची आसल्यार ती बेगोबेग जावची.

सुहासिनी प्रभुगांवकार
9881099260