अधर्माचो प्रतिकार करपा खातीर समाजाक तयार करचो पडटलो : गोविंद देवगिरी महाराज

भांगरभूंय | प्रतिनिधी

२० हजारांचे हाजेरींत ‘सनातन राष्ट्र संकल्प धर्मसभा’

फोंडें ः फकत जप करीत बसल्यार कामां जावचीं नात. भगवान श्रीकृष्णान अर्जुनाक सांगिल्लें, ‘म्हाका याद कर, मात झृज कर!’ स्वातंत्र्या उपरांत ७० वर्सां आमच्या देशाचेर ‘काळ्या’ इंग्रजांची सत्ता आशिल्ली. आयज आमचो देश धर्मशाळा जाला. आतां समाजाक अधर्माचो प्रतिकार करपाक तयार करपाची गरज आसा. सनातन धर्माच्या आड येवपी कायद्यांत बदल करून देशांत खंयचे कायदे जाय, हाचेर विचार आनी यत्न करपाची गरज आसा, अशें मार्गदर्शन श्रीरामजन्मभूमी तीर्थक्षेत्र न्यासाचे कोषाध्यक्ष स्वामी गोविंद देवगिरीजी हांणी केलें. ह्या वेळा देशविदेशांतले २० हजारां परस चड हिंदू हजर आशिल्ले.
सनातन संस्थेचे संस्थापक सच्चिदानंद परब्रह्म डॉ. जयंत आठवले हांचो ८३ वो जल्मोत्सव आनी संस्थेच्या रुप्या महोत्सवी वर्सा निमतान गोंय अभियांत्रिकी महाविद्यालयाच्या मैदानाचेर ‘सनातन राष्ट्र शंखनाद महोत्सव’ आयोजीत केला.

गोविंददेवगिरी महाराज हांणी मुखार म्हणलें, ‘‘सनातन संस्थेचे पुराय कार्य आध्यात्मिकतेच्या पायाचेर उबें आसा. भगवद्गीता झुजाचे भुमीचेर सांगिल्लो ग्रंथ. सनातन संस्थेनूय ह्या ग्रंथा प्रमाणूच अध्यात्मा पसून युद्धा मेरेन जागृती केल्या. हांव ह्या महोत्सवांत झुजां कलांचें प्रदर्शन पळयलां. म्हाका दिसता देशांतल्या सगल्या संतांनी तांच्या शिश्यांक ही झुजां कला शिकोवपाक जाय.
देशांत अल्पसंख्यांकांचो आंकडो बरोच वाडत आसा. हिंदूंचो आंकडो सामको उणो आसा. अल्पसंख्याकांचो आंकडो करोडांनी वाडटनाच तांकां अल्पसंख्याक कशे म्हणप? अल्पसंख्यांकांक लागूनच लव्ह जिहाद, लँड जिहाद, धर्मांतर हाचे सयत खुबश्या समस्यांक हिंदू बळी पडटात. देशांत दर दिसा १० हजार लोकांचें धर्मांतर जाता. हवाला वरवीं पयशांचें फंडींग जाल्ल्यान हें धर्मांतर जाता. घुसखोर सिंगापूर, चीन, अरब राष्ट्रांत घुसखोरी करिनासतना ते भारतांतूच कित्याक येतात? कारण काँग्रेसीन केल्ल्या खुबश्या कायद्यां वरवीं तांकां फकत सुविधाच मेळटात अशें ना. जाल्यार कायदेशीर आश्रयूय मेळटा. हाका लागून लोकसंख्या नियंत्रण कायदो होच जायत्या समस्यांवेली जाप जावन आसा, अशी अधिवक्ता अश्विनी उपाध्याय हांणी सांगलें.