अदिती स्वामीचें इतिहासीक प्रदर्शन

भांगरभूंय | प्रतिनिधी

17 वर्सां पिरायेचे अदिती स्वामी हिणें संवसारीक तिरंदाजी वस्तादपण सर्तींत भांगरा पदक जिखलें. हे सर्तीच्या इतिहासांत वैयक्तीक गटांत भांगरा पदक जिखपी स्वामी भारताची पयली खेळगडी थारली. फायनलींत तिणें दोन खेपेची संवसारीक वस्ताद मॅक्सिकोचे अॅण्ड्रिया बेरेरा हिका 149-147 अशा फरकान हारयली.

ह्या जैता सयत अदिती संवसारीक वस्तादपण सर्तींत एकाच हंगामांत दोन खेपे भांगरा पदक जिखपी संवसारांतली पयली तिरंदाज थारली. अदिती 18 वर्सां पिराये सकयले (कॅडेट) गटांत लेगीत संवसारीक वस्ताद आसा. अदिती खेरीत ह्या गटांत ज्योती सुरेखान कांश्या पदक जिखलें.

जर्मनीची राजधानी बर्लिनांत चालू आशिल्ले हे सर्तीच्या इतिहासांत भारताचें हें वट्ट दुसरें भांगरा पदक थारलें. एक दीस पयलीं भारतीय बायलांच्या कम्पावण्ड पंगडान भांगरा पदक जिखिल्लें.

भारताची वट्ट पदकांची संख्या 14चेर पावली. 1931त पयले खेपे तिरंदाजी वस्तादपण सर्तीचें आयोजन केल्लें. पूण, कम्पावण्ड प्रकाराचो आस्पाव 1995त केल्लो. कम्पावण्ड प्रकाराचो आस्पाव ऑलिम्पिकांत करूंक ना.

अदितीन फायनलींत उत्कृश्ट प्रदर्शन केलें. तिणें पांच सेटांतलो फकत एकूच नेम 9 गुणाचेर मारलो. बाकीचे तीर सामकें 10 गुणांचेर मारले. अदितीन पयल्या सेटांत तीन परफेक्ट 10 मारून 30 गूण मेळयले. जाल्यार मॅक्सिकोचे खेळगडयेक 29 गूण फावो जाले. अदितीन दुसरे, तिसरे आनी चवथ्या सेटांत परफॅक्ट 10 गूण मेळयले. निमाण्या सेटांतलो पयलो तीर 9चेर बसलो. ताका लागून अदितीक 150तले 149 गूण फावो जाले.

दुसरे वटेन दोन खेपेची संवसारीक वस्ताद अॅण्ड्रियान पयल्या सेटांत एका गुणान फाटीं पडल्या उपरांत दुसऱ्या सेटांत 30 गूण मेळयले. तिसऱ्या आनी चवथ्या सेटांत तिका 29-29 गूण फावो जाले. पांचवे आनी निमाण्या सेटांत 30 गूण घेवन लेगीत तिका दुसरे सुवातेर समाधान मानचें पडलें.

मजगतीं, ज्योती सुरेखाक तिसरी सुवात फावो जाली.

तिरंदाजींत संवसारीक करंड सर्त आनी संवसारीक वस्तादपण सर्तीचे दोन इव्हेंट जातात. संवसारीक तिरंदाजी वस्तादपण सर्तीची सुरवात 1931त जाल्ली. 1931 ते 1969 मेरेन ताचें दरेक वर्सा आयोजन जातालें. जाल्यार 1969 उपरांत हाचें आयोजन दरेकी दोन वर्सांनी जावपाक लागलें. भारतान हे सर्तींत णव खेपे रुप्या पदकां आनी दोन खेपे कांश्या पदकां जिखल्यात.

जाल्यार संवसारीक सर्तीचें आयोजन करपाची सुरवात 2006 सावन सुरू जाल्या. संवसारीक सर्त चार वर्सांनी जाता.

ओजस देवतळेक भांगर

भारता खातीर कालचो दीस भांगराळो थारलो. अदिती स्वामी उपरांत ओजस देवतळेन दादल्यांच्या वैयक्तीक गटांत भांगरा पदक जिखलें. भांगरा पदक जिखपी ओजस भारताचो पयलो दादलो तिरंदाज थारलो. फायनलींत ताणें 150 गूण जिखून भांगरा पदक जोडलें.