भांगरभूंय | प्रतिनिधी
प्रामाणीक तज्ञांची नवी समिती नेमपाची मागणी
नवी दिल्ली, खबरां संस्था ः अदानी- हिंडेनबर्ग प्रकरणांत सर्वोच्च न्यायालयांत नवी याचिका दाखल जाल्या. याचिकेंत ह्या प्रकरणाच्या चवकशी खातीर नवी तज्ञ समिती तयार करपाची विनवणी केल्या. ज्या व्यक्तींची प्रतिमा निर्दोश, पारदर्शक आसा आनी जांचो अदानी- हिंडेनबर्ग प्रकरणांत खंयच्याच प्रकारान संबंद आसूंक फावना, म्हळ्यार हितसंबंदाचो संघर्श आसूंक फावना अश्यो व्यक्ती समितींत आसपाक जाय, अशें हे याचिकेंत म्हणलां. आदले समितींतल्या कांय जाणांचे अदानी हांचे कडेन लागींचे संबंद आसात, असो गंभीर आरोपूय हे याचिकेंत केला. काॅन्फ्लिक्ट आॅफ इंटरेस्ट, अशें उतर तांणी वापरलां.
याचिकादार अनामिका जयस्वाल हांणी आपलो वकील रमेश कुमार मिश्रा वरवीं सर्वोच्च न्यायालयांत ही याचिका दाखल केल्या. 24 जानेवारी 2023 दिसा अमेरिकन शॉर्ट सेलर कंपनी हिंडेनबर्ग रिसर्चान अदानी गटाचेर पयशे लुटपा सावन शेअर हाताळणी मेरेनचो आरोप केलो. ह्या प्रकरणाची चवकशी करपा खातीर सर्वोच्च न्यायालयान 6 वांगड्यांची समिती स्थापन केल्ली.
समितीचे मुखेली निवृत्त न्यायाधीश ए. एम. सप्रे आशिल्ले. तांचे वांगडा न्यायाधीश जे. पी. देवधर, ओ. पी. भट, एम. व्ही. कामत, नंदन नीलेकेणी आनी सोमशेखर सुंदरम हांचो आसपाव आशिल्लो. समितीन 19 मे 2023 दिसा आपलो चवकशी अहवाल जाहीर केल्लो.
तज्ञ समितीच्या अहवालांतले प्रस्न
समितीन अहवालांत म्हणलां- अदानी गटांत गुंतवणूक करपी 13 परकी निधींचो प्रमोटरां कडेन संबंद आसूं येता, असो दुबाव सेबीक आसा.
अदानी गटाच्या शेअरांत वॉश ट्रेडाची कसलोच नमुनो सांपडूंक ना. वॉश ट्रेड म्हळ्यार आंकडो वाडोवपा खातीर स्वता शेअर विकतें घेवप आनी विकप.
हिंडेनबर्ग अहवाल उजवाडाक येवचे पयलीं कांय संस्थांनी ल्हान ल्हान शॅर घेतिल्ले. शेअराचें मोल देंवतकच ताणें तें विकतें घेवन स्वताचो फायदो करून घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
