भांगरभूंय | प्रतिनिधी
भांगरभूंय । प्रतिनिधी
मुरगांवः स्टेट बँक आनी एलआयसीचे 20 हजार कोटी रुपये अदानी समूहाक प्रधानमंत्री नरेंद्र मोदी हाणे दिल्ले खातीर राहुल गांधी हाणे लोकसभेंत आवाज उठयल्ल्यान हुकूमशाही प्रवृत्तीच्या भाजपा सरकारान कट रचून तांची खासदारकी रद्द केली असो आरोप प्रदेश काँग्रेस अध्यक्ष अमित पाटकारान वास्को हांगा आयोजीत केल्ल्या संकल्प सत्याग्रहांत केलो. राज्यांतल्या भाजपा सरकारान मोदी हांचे सूचोवणे वयल्यान अदानी समूहाचो मुरगांव बंदरांतलो कोळसो तीन पटीन वाडयला आनी ताची येरादारी करपाक लोकांच्या घरांचेर बुलडोझर फिरोवन रेल्वे दुपदरीकरणाचें काम चललयां अशें ताणे सांगलें.
प्रदेश काँग्रेस समितीन वास्को शारांत मुरगांव पालिका इमारती सामकार आयोजीत केल्ल्या ह्या सत्याग्रहांत वास्कोचो आदलो आमदार कार्लुस आल्मेदा, सुनील कवठणकार,सुभाष फळदेसाय, कॅप्टन विरीयतो फर्नाडीस, ओलेन्सियो सिमाँईश, दक्षीण गोंय काँग्रेस अध्यक्ष सावियो डिसोझा, बायल कााँग्रेस अध्यक्ष बीना नायक, नितीन चोपडेकार, मुरगाव काँग्रेस गटाध्यक्ष योगिता पार्सेकार, वास्को काँग्रेस गटाध्यक्ष अँड. मॅलविन फर्नाडीस, दाबोळी काँग्रेस गटाध्यक्ष वसंत नायक, कुठ्ठाळी काँग्रेस गटाध्यक्ष पीटर डिसोझा हांणी वांटो घेतल्लो. राजीव गांधी हांचेर केल्ल्या अन्यायाचो निशेध करपा खातीर प्रदेश काँग्रेस समिती सगल्या तालुक्यांत सत्याग्रह आंदोलन करतली अशें पाटकारान सांगलें.
मोदी हांचे हुकूमशायेक लोक बेजारल्यात आनी फुडल्या वर्सा जावपी लोकसभा वेंचणुकेंत लोक भाजपाक धडो शिकयतले अशें कार्लुस आल्मेदान सांगलें. राज्य सरकार रेल्वे दुपदरीकरण फकत अदानीच्या फायद्या खातीर करता असो आरोप ओलेन्सियो सिमॉईशान केलो. लोकशाय सोपोवन देशांत आपली एकतंत्री राजवट हाडपाचो मोदी हांचो कट आसा अशें कॅप्टन विरियातोन सांगलें. सत्याग्रहींक सुरवेक सुभाष फळदेसायान येवकार दिलो आनी मॅलवीन फर्नांडीसान तांचे उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
