भांगरभूंय | प्रतिनिधी
बंगळुरू, खबरां संस्था: बंगळुरू नोकरी करपी अतुल सुभाष हांणी बायल आनी मावोडेंच्या कांय जाणांच्या त्रासांक बेजारून आत्महत्त्या केल्ली. मरणा पयलीं देड वराचो व्हिडियो आनी २४ पानांचे आत्महत्या पत्रांत तांणी असो दावो केल्लो. उपरांत ताची बायल निकिता सिंघानिया आनी तिच्या कुटुंबांतले सगळे फरारी आसले. आयज सकाळीं तांकां अटक केल्या. बंगळुरू पुलिसांनी अतुलाचे बायलेक गुरुग्राम हांगच्यान जाल्यार आवय निशा सिंघानिया आनी भाव अनुराग सिंघानिया हांकां प्रयागराजांतल्यान ताब्यांत घेतलीं.
निकिता आनी तिच्या कुटुंबांतल्या लोकांक पुलिसांनी शुक्रारा नोटीस धाडून तीन दिसांनी चवकशे खातीर हजर रावपाक सांगिल्लें. उपरांत सिंघानिया कुटुंबान अलाहाबाद उच्च न्यायालयांत अंतरिम जामीन मेळचे खातीर अर्ज केल्लो. आतां तिगांकूय अटक केल्या. तांकां न्यायालया मुखार हजर केल्ले उपरांत न्यायालयीन बंदखण दिल्या, अशी म्हायती पुलीस उपायुक्त शिवकुमार हांणी दिली.
अतुल सुभाष हांचो व्हिडियो आनी आत्महत्या पत्राची न्यायवैधक प्रयोगशाळेंत तज्ञां कडल्यान तपासणी करतात. तशेंच अतुल सुभाष हांचो भाव विकास कुमार हांचे कागाळी उपरांत बंगळुरू पुलिसांनी सिंघानिया कुटुंबाचेर आत्महत्येक प्रवृत्त केल्ल्याचो गुन्यांव दाखल केल्लो. हातूंत निकिता आरोपी क्र. १, ताची आवय निशा आरोपी क्र. २ आनी भाव अनुराग आरोपी क्र. ३ आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
