भांगरभूंय | प्रतिनिधी
बंगळुरू, खबरां संस्था: फाटल्या वर्सा डिसेंबरांत बंगळुरुचो तंत्रज्ञ अतुल सुभाष हाणें आत्महत्या केल्ली. उपरांत ताचे आवयन चार वर्सां पिरायेच्या नातवाचो ताबो मेळचे खातीर सर्वोच्च न्यायालयांत याचिका दाखल केल्ली. ती सर्वोच्च न्यायालयान भायर मारून, अतुल सुभाष हांच्या पुताचो ताबो ताचे आरोपी बायले कडेनूच उरतलो अशें स्पश्ट केलें.
न्यायाधीश बी. व्ही. नागरत्ना आनी न्यायमूर्ती सतीश चंद्र शर्मा हांच्या खंडपीठान व्हिडिओ कॉन्फरन्सिंगा वरवीं संवाद सादलो आनी ताचे उपरांत तो आवय निकिता सिंघानिया हिचे कडेनूच रावतलो असो निर्णय दिलो. ताचे पयलीं, सर्वोच्च न्यायालयान म्हणिल्लें, अतुल सुभाष हांच्या पुताच्या ताब्याचो मुद्दो खटलो चलोवपी न्यायालया मुखार हजर करपाक शकता.
अतुल सुभाष हांची आवय अंजू देवी हांणी तिच्या नातवाचो ताबो मेळचे खातीर दाखल केल्ले हेबियस कॉर्पस याचिकेचेर सुनावणी करतना सर्वोच्च न्यायालयान त्या भुरग्या खातीर अनवळखी आशिल्ल्याचीय टिप्पणी केल्ली.
३४ वर्सां पिरायेचो तंत्रज्ञ सुभाष ९ डिसेंबर २०२४ दिसा बेंगळुरूच्या मुन्नेकोलालू हांगा तांच्या घरा मरण आयिल्ले अवस्थेंत सांपडिल्लो. तांणी आत्महत्ये पयलीं ताची बायल निकिता सिंघानिया आनी सासरच्या लोकांनी आपलो छळ केल्ल्याचो आरोप करपी व्हिडिओ आनी चिट बरयिल्ली. हे घडणुके उपरांत अतुल हांका आत्महत्येक प्रवृत्त केल्ल्याच्या आरोपा खाला तिका अटक केली आनी तिचो सशर्त जामीनूय मंजूर केलो. ४ जानेवारीक बंगळुरूच्या शहर दिवाणी न्यायालयान अतुल सुभाष हांची बायल निकिता सिंघानिया, सासू निशा सिंघानिया आनी मेहुणा अनुराग सिंघानिया हांकां जामीन मंजूर केल्लो.
ह्या प्रकरणांतली आरोपी निकिता, निशा आनी अनुराग हांकां १५ डिसेंबराक अटक केल्ली. अटके उपरांत, तिनूय आरोपींक न्यायालयीन बंदखणींत धाडिल्लीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
