भांगरभूंय | प्रतिनिधी
निलेश काब्रालः उरिल्ले गांव वगळावपा खातीर नव्यान यत्न करपाची हमी
भांगरभूंय । प्रतिनिधी
पणजीः पश्चीम घांट पर्यावरण संवेदनशील वाठाराच्या निकशांत गोंयांतल्या 99 तले फक्त 26 गांव येतात. उरिल्ले गांव हे वळेरेंतल्यान वगळावपाचे यत्न करतले. गरज पडल्यार एका गांवाचे दोन भाग करतले, अशी हमी पर्यावरण मंत्री निलेश काब्राल हांणी बिरेस्तारा विधानसभेंत दिली.
पर्येंची आमदार दिव्या राणे हांणी मांडिल्ले पश्चीम घांट पर्यावरण संवेदनशील वाठारांत परतून आस्पाव केल्ल्या 56 गांवां संबंदांत लक्षवेधी सुचोवणेक जाप दितना मंत्री काब्राल उलयताले.
पश्चीम घांट अतिसंवेदनशील वाठारांतल्यान गोंयांतल्या 99 तले कांय गांव वगळावपाचो सरकाराचो प्रस्ताव केंद्रा कडेन आसतना आनी फाटल्या कांय वर्सां सावन आपूण ते विशीं केंद्र सरकारा कडेन फाटपुरवण करतना केंद्रीय रान, पर्यावरण आनी वातावरण बदल मंत्रालयान नव्यान जारी केल्ल्या मसुदो अधिसुचोवणेंत त्या सगळ्याच 99 गांवांचो आस्पाव केला. मुळांत ह्या 99 तले फक्त 26 गांव पश्चीम घांट अतिसंवेदनशील वाठाराच्या निकशांत येतात. उरिल्ल्या गांवांचो कांय वाठार निकशांत येता. अशा गांवांचे दोन भाग करून त्या गांवांतलो उरिल्लो भाग वाटयतले, अशें मंत्री काब्राल हांणी सांगलें.
पश्चीम घांट अतिसंवेदनशील वाठारांतल्यान गोंयांतले 73 गांव वगळावपाचे मागणेची आपूण मुख्यमंत्री डॉ. प्रमोद सावंत हांच्या फुडारपणा खाला सेगीत केंद्रा कडेन फाटपुरवण करता. फुडरांत राज्यांतल्या शिश्टमंडळाक दिल्ली व्हरून गोंयची मागणी नेटान मांडटलों, अशेंय मंत्री काब्राल हांणी सांगलें. मजगतीं, पश्चीम घांट पर्यावरण अतिसंवेदनशील वाठारांत सत्तरींतल्या 56 गांवांचो आस्पाव केला. हाचो सत्तरीचे उदरगतीचेर व्हड परिणाम जातलो. ताका लागून राज्य सरकारान ताकतिकेन हातूंत लक्ष घालून सत्तरींतले चडशे गांव मसुदो अधिसुचोवणेंतल्यान वगळावचे, अशी मागणी आमदार दिव्या राणे हांणी केली.
सभापती सयत गणेश गांवकार हांची मागणी
सांवड्डेंचे आमदार गणेश गांवकार हांचे सयत सभापती रमेश तवडकार हांणीय सांगें, सांवड्डें, काणकोण ह्या मतदारसंघांत येवपी गांवां विशींय योग्य निर्णय घेवचो, अशी मागणी मुख्यमंत्री डॉ. प्रमोद सावंत हांचे कडेन केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
