भांगरभूंय | प्रतिनिधी
भांगरभूंय । प्रतिनिधी
वास्कोः मुरगांव पालिका मंडळान बिरेस्तारा वास्कोच्या भाजी मार्केटांत रस्त्यार अतिक्रमण करपी भाजी विक्रेत्यांचेर परत एक फावट कारवाय केली तशेंच पिशी डोंगरी- खारीवाडो वाठारांत बेकायदेशीरपणान ठोक नुस्तें विकतल्यांचे नुस्तें जप्त केलें. पालिकेच्या ह्या कारवायेचो तांणी निशेध केला.
भाजीवाल्यांक अतिक्रमण करचें न्हय असो आदेश दिवंन लेगीत ते जाग्यार येनात म्हणून परत कारवाय करची पडली. नगराध्यक्ष लिओ रॉड्रिग्ज हांणी सांगिल्ल्यान आमी ही माल जप्तीची कारवाय केल्या अशें भाजी मार्केट वेवस्थापक समितीचो मुखेली तशेंच नगरसेवक विनोद किनळेकारान सांगलें. आमचो म्हाल जप्त करून पालिका मंडळ तो अनाथाश्रमाक दितात. दंड घेवन तो परत आमकांच दिवचो अशी सूचोवणी भाजी मार्केट संघटनेचो अध्यक्ष प्रशांत नायक हांणी पालिका मंडळाक केल्या. पालिकेन मार्केटांत अतिरिक्त सुवात दिवपाचो विचार करचो अशें तांणे मागालं. जप्त केल्लो म्हाल नेमा प्रमाण पावणी करून विकचो पडटा असो युक्तिवाद करून पालिकेन कारवाय करपाचें चालूच दवोरल्यार पुराय मार्केट बंद करपाची शिटकावणी ताणे पालिका मंडळाक दिल्या.
मजगतीं, पिशीं डोंगरी- खारीवाडो वाठारांत बेकायदेशीर गाडे घालून ठोक नुस्तें विकतल्यांचेर पालिका मंडळान कारवाय करून तांचें नुस्तें जप्त केलें. ही ठोक नुस्तें विक्री बंद करपाची शिटकावणी पालिका मंडळान पयलीं दिल्ली. मात ताचे कडेन आडनदर करून ती चालूच दवोरल्ली. वास्कोच्या नुस्ते मार्केट वेपारी संघटनेन केल्ले कागाळेक लागून पालिका मंडळान निमाणे तांचेर कारवाय करची पडली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
