अतिक्रमणाचेर चोपडें ग्रामसभेंत नेटाची चर्चा

भांगरभूंय | प्रतिनिधी

पंचायतीन दिल्ले मान्यतायेचेर पुनर्विचार करपाची लोकांची मागणी

भांगरभूंय । प्रतिनिधी

पेडणें: आगरवाडो चोपडें पंचायतीच्या आयतारा जाल्ले ग्रामसभेंत मुखेलपणान चोपड्या पुला लागसार रिवा रिसॉर्ट, शापोरा न्हंयेदेगे वयल्या केटीसी आनी आगरवाड्या वयली फॅलिसिटी कॉटेजीचेर नेटान चर्चा जाली. थळाव्यांच्या हिताचो विचार करून पंचायतीन दिल्ल्यो अटी पुराय जावंक नाजाल्यार ह्या प्रकल्पां संबंदांत पुनर्विचार करपाची मगणी लोकांनी पंचायत मंडळा कडेन केली.

आगरवाडो चोपडें पंचायतीच्या मिनी सभाघरांत जाल्ले ग्रामसभेचे अध्यक्षपद अँथोनी फर्नांडीस हांणी सांबाळ्ळें. तांचे वांगडा माचयेर उपसरपंच शिल्पा शरद नायक, संगीता नायक, रुपाली लिंगुडकार, भगीरथ गांवकार, सचीन रावत, हेमंत चोपडेंकार आनी पंचायत सचीव दशरथ परब हाजीर आशिल्ले.

सरपंच अँथनी फर्नांडीस हांणी येवकार दिलो. सचीव दशरथ परब हांणी फाटले सभेचें इतिवृत्त वाचून कायम केलें. ते उपरांत 2023-24 च्या अदमासपत्रकाक मंजुरी दिली. ते आदीं अदमासपत्रकाचे प्रतीची लोकांनी केल्ली मागणी मान्य केली.

ग्रामसभेंत आगरवाड्या वयल्यो फसिलिटी कॉटेजी उबारतना परंपरीक पांयवाट बंद केल्ले खातीर लोकांनी पंचायत मंडळाक धारेर धरलें. आदींच्या पंचायत मंडळान त्या प्रकल्पाक मंजुरी दिवचे आदीं ज्यो अटी घातिल्ल्यो त्यो पुराय करूंक ना जाल्यार त्या प्रकल्पाची मान्यताय दिल्ले खातीर हरकत घेतली. त्यो अटी पुराय करूंक ना जाल्यार त्या प्रकल्पाक दिल्ली मंजुरी रद्द करची, अशें ह्या वेळार थारलें.

चोपड्यां रिवा रिसॉर्टान सरकारी जमनीचेर अतिक्रमण केल्ल्या बांदकामाचेर कारवाय करची, अशी मागणी लोकांनी केली. त्या संबंदांत पंचनामो केला आनी भौशीक बांदकाम खात्या कडेन कागाळ केल्या, अशें पंचायत मंडळान सांगलें. तेचवरी मातयेचो भराव घातिल्ल्याचे आनी कांदळी मारिल्ल्याचे कागाळे वयल्यान रान खात्यान पंचनामो केला. ह्या संबंदांत योग्य ती कारवाय करतले, अशी म्हायती सरपंच फर्नांडीस हांणी दिली.

शापोरा न्हंयेदेगेर परंपरीक मिठागरां पुरोवन उबारिल्ल्या केटीसी प्रकल्पाक लागून परंपरीक व्हाळ, शेताचें उदक भायर वचपा खातीर आशिल्ली मानस मोडल्या. ताका लागून पावसाच्या उदकाक वचपाक वाट मेळची ना. शेत जमीन उदका पोंदा वतली. ते खातीर अतिक्रमण करून बांदिल्ल्या प्रकल्पाचेर कारवाय करची. तशेंच शिंपणावळ खात्या वतीन सुमार 9 लाख रुपया खर्च करून बांदतात ते राखणे वण्टीचे काम योग्य तरेन जावचें हे खातीर पंचायत मंडळान लक्ष दिवचें, अशी लोकांनी मागणी केली.

आगरवाडो चोपडें पंचायत वाठारांत भुंयगत वीज केबलां खातीर खणिल्ल्या रस्त्यांक लागून लोकांक खूब त्रास जाता. ते खातीर पावसाळ्या आदीं ह्या रस्त्याचें डांबरीकरण करचें, गटारां नितळ करची अशी मागणी लोकांनी केली. हो वावर करपाचें आस्वासन सरपंचान दिलें.

आमगरवाडो ते मांद्रे मेरेनचो बायपास रस्तो फक्त दुचाकीं खातीर उक्तो दवरचो. चोपडें पुला खाला काडटात त्या बेकायदो रेंव काडप्यांचेर कारवाय करची, जैविवीधता अहवाल, केबलां खातीर पंचायत शुल्क घेवप, कांदळींची लागवड, पंचायत सभाघर, कोयर प्रकल्प ह्या विशयांचेर चर्चा करून निर्णय घेतले.

जे मेरेन कोयराचो विलो लावचे खातीर जमीन निश्चीत जायना ते मेरेन कोयर कर लागून करचो न्हय, अशी मागणी लोकांनी केली. ग्रामसभेंत जाल्ले चर्चेंत अमोल रावत, आनंद नायक, एकनाथ चोडणकार, सीताराम परब, नरेश चोपडेंकार, गुणाजी अमेरकार, उमेश लिंगुडकार हांणी वांटो घेतलो. सरपंच फर्नांडीस हांणी उपकार मानले.