भांगरभूंय | प्रतिनिधी
म्हापशें पालिकेची भौशीक नोटीस; 7 दिसांची मुजत
भांगरभूंय । प्रतिनिधी
म्हापशें: म्हापशें पालिका वाठारांतलीं दुकानां, घोळटे विक्रेते वा हातगाड्यांनी फुटपाथीचर केल्ले अतिक्रमण फुडल्या सात दिसां भितर काडचें, ना जाल्यार पालिके कडल्यान तें सगळें साहित्य जप्त करतले, अशी भौशीक नोटीस म्हापशें पालिकेन जारी केल्या.
म्हापशें शारांतल्यो फुटपाथी दुकानकार, घोळटे विक्रेते आनी हेरांनी आपलो म्हाल दवरून आडायल्यात, अशें पालिकेचे नदरेक आयलां. ताचेर कारवाय म्हूण पालिकेन ही नोटीस जारी केल्या.
एकादो वेवसायीक, दुकानकार आपलो म्हाल फुटपाथीचेर वा दुकाना भायर रास दाळून दवरपा सयत थंय त्या म्हालाची विक्री करता आसत जाल्यार तशेंच घोळटे विक्रेते फुटपाथीचेर म्हालाची विक्री करता आसत वा फुटपाथीचेर म्हालाची रास मांडून दवरता आसत जाल्यार तशेंच पालिके मंडळाचे परवानगे बगर वेवसाय करता आसत जाल्यार तेचवरी पालिकेची परवानगी घेनासतना घोळटो गाडो वेवसाय करता जाल्यार वा हेर दुकानांत रुपांतर केलें जाल्यार, पालिका मंडळाचे परवानगे बगर कसलोच सायनबोर्ड, तकटे वा बीलबोर्ड उबारला जाल्यार हाका अतिक्रमण अशें मानतले. हो अतिक्रमणाचो प्रकार ताकतिकेन बंद करचो. 29 मार्च सावन सात दिसां भितर हीं अतिक्रमणां स्वता काडलीं नात जाल्यार पालिका मंडळा कडल्यान ते साहित्य जप्त करतले, अशें नोटिशेंत म्हणलां.
बेकायदो प्रकार आडावपाक पावलः मुख्याधिकारी
म्हापशें शारांतल्यो खूबश्यो फुटपाथी वेपाऱ्यांनी, विक्रेत्यांनी आडायल्यात. तशेंच पालिकेन परवानो दिल्ल्या खूबशा हातगाड्यांचें दुकानांत रुपांतर केलां, अशें पालिकेचे नदरेक आयलां. ते प्रमाण आमी भौशीक नोटीस जारी करून हो बेकायदो प्रकार आडावपा खातीर पावल उखल्लां, अशी म्हायती पालिका मुख्याधिकारी अमितेश शिरवयकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
