भांगरभूंय | प्रतिनिधी
पणजी, गोंयची राजधानी. निळसार मांडवी न्हंयेची देग, इतिहासीक दायज, पर्यटन आनी संस्कृतीक वैविध्या खातीर वळखलें वचपी ह्या शारान ह्या म्हयन्यांत एका इतिहासीक अध्यायाची नोंद केल्या. एका साहित्यीक सुवाळ्याचें तें साक्षीदार थारलां. गोयांत पयलेच फावट राष्ट्रीय पुस्तक प्रदर्शन आयोजित केलां. तें गिन्यान, विचार आनी संस्कृतीचो एक भव्य संगम थारतलें.
हें राष्ट्रीय पुस्तक प्रदर्शन पणजेंतल्या भाऊसाहेब बांदोडकार मैदानाचेर चालू आसा. सकाळीं 11 ते रातच्या 8 वरां मेरेन सगळ्यां खातीर उक्तें आसा. तें गोंयकारां वांगडा देश- विदेशांतल्या पर्यटकांक गिन्यानाच्या म्हासागरांत बुडी मारपाची संद दितलें. ‘कथांचो महासागर’ ही संकल्पना आशिल्ल्या ह्या महोत्सवांत फकत पुस्तकां न्हय, तर देशांतल्या विचारवंतांचें वैचारिक मंथन अणभवपाची संद गोंयकारांक मेळटली.
ह्या महोत्सवाचें मुखेल आकर्षण म्हणल्यार विंगड-विंगड नामवंतांची उपस्थिती आनी तांचीं संवाद सत्रां. 6 फेब्रुवारी: फामाद लेखक शांतनू गुप्ता, 7 फेब्रुवारी: ज्येष्ठ पत्रकार एम.जे. अकबर आनी मेधा खासगीवाले, 8 फेब्रुवारी: ज्येष्ठ साहित्यिक डॉ. सदानंद मोरे आनी हेरांची व्याख्यानां आसतलीं. हांगा उबे केल्ले पुस्तकांचे स्टॉल्स पळोवपा सारके. हातूंत अध्यात्मा सावन आधुनिक विज्ञाना मेरेन आनी ‘नेशन फर्स्ट’ (राष्ट्रवाद) सावन पत्रकारिते मेरेनच्या सगळ्या विशयां वयल्या पुस्तकांचो आस्पाव आसा. वाचकां खातीर जाय तीं पुस्तकां खरेदी करपाची ही व्हड संद आसा. हांगा इतिहासाचे दाखले, फुडारांतलीं सपनां आनी अंतर्मनाचा वेध घेवपी दिग्गजांच्या उतरांची मेजवानी वाचकां खातीर आसतली. गिन्यानाचो हो महासागर अणभवपा खातीर आनी आपल्या आवडट्या लेखकां कडेन थेट संवाद साधपा खातीर साहित्याच्या ह्या महाकुंभांत वांटेकार जावंक जाय.
ह्या पुस्तक प्रदर्शनांत मराठी, कोंकणी, हिंदी, इंग्लीश सयत सगळ्या भारतीय भाशांमधलीं वेग-वेगळ्या विशयांवयलीं पुस्तकां मेळटलीं. नॅशनल बुक ट्रस्टाच्या वांट्याक लागून देशांतले नामनेचे प्रकाशक आनी लेखक हांगां वांटो घेतले.
आजच्या डिजिटल युगांत मोबायल, सोशल मीडिया आनी कृत्रिम बुद्धिमत्तेच्या (AI) नेटान वाडट्या प्रभावाक लागून वाचपाची सवय उणी जायत चल्ल्या. अशा काळांत, वाचकांक परतून एकदां पुस्तकां वटेन ओडपी हो उपक्रम म्हणल्यार समाजाक दिल्ली एक सकारात्मक दिशा आसा. पुस्तक म्हणल्यार फकत कागदाचेर छापिल्लीं अक्षरां न्हय, तर तें संस्कार, विचार आनी विवेक निर्माण करपी एक माध्यम आसा. हेच जाणविकायेंतल्यान पणजेंत आयोजित जावपी हें राष्ट्रीय पुस्तक प्रदर्शन म्हत्वाचें थारता.
पुस्तक प्रदर्शना वेळार फकत पुस्तकां पळोवपा पुरते मर्यादित न उरतां, विंगड विंगड साहित्यीक चर्चा, परिसंवाद आनी मार्गदर्शन सत्रां आयोजित केल्यांत. भारतभरांतल्यान आयिल्ले बरोवपी, विचारवंत, अभ्यासक आनी वाचक ह्या चर्चांनी वांटो घेतले. चड करून अध्यात्म, बालसंस्कार, वाचनसंस्कृती आनी राष्ट्रभावना ह्या विशयांचेर जावपी चर्चांतल्यान हाजीर आशिल्ल्यांक योग्य दिशा आनी प्रेरणा दिवपाचें काम केलें वतलें.
अश्या वैचारीक संवादातल्यान प्रदर्शनाक फकत वेपारी न्हय, तर बौद्धिक आनी संस्कृतीक उंची मेळटा. वाचकांक प्रश्न विचारपाची, संभ्रम मांडपाची आनी विचारांची देवाणघेवाण करपाची संद मेळटा. पुस्तक प्रदर्शना वेळार साहित्तीक चर्चा, परिसंवाद आनी मार्गदर्शन सत्रांचें आयोजन केलां, जाका लागून लेखक-वाचक संवाद घडून येतलो. डिजिटल युगांत वाचपाची संस्कृती राखून दवरपाक आनी ती वाडोवपाक अशा उपक्रमांचें म्हत्व चड वाडलां.
वाचन संस्कृती समाजांतल्या मनशांक सुसंस्कृत आनी प्रगल्भ करपाचें ध्येय बाळगता. आयच्या धांवपळीच्या युगांत मनशाच्या मनाक शांतताय आनी योग्य दिका मेळपा खातीर हें पुस्तक प्रदर्शन खूब उपेगी थारतलें. वाचन संस्कृती तिगोवन दवरपा खातीर तरुण पिळगेक ल्हानपणा सावन वाचपाची गोडी लावप गरजेचें आसा. पुस्तक महोत्सव आनी हेर साहित्तीक कार्यावळी लोकां कडेन पुस्तकां जोडपा खातीर एक बरी संद दितात.
प्राचीन नालंदा विद्यापीठ हें संवसारांतलें पयलें म्हान ज्ञानकेंद्र आशिल्लें. थंय संवसारभरांतले विद्यार्थी ज्ञाना खातीर येताले. आयच्या काळांत पुस्तक महोत्सव आनी पुस्तक प्रदर्शनां हींच त्या नालंदा परंपरेचीं आधुनिक रुपां आसात. वाचन हें मेंदवाचें अन्न. दरेएका घरांत पुस्तकां खातीर एक खाशेली सुवात – एक ‘ज्ञानाचो बॉक्स’ आसपाकच जाय. भुरगेपणांत मेळिल्ले संस्कार आयुश्यभर साथ दितात. मोबाईलच्या पडद्या परस पुस्तकांच्या सांगातांत वाडिल्ली पिळगी चड संवेदनशील, विवेकी आनी संस्कारक्षम थारता. हे नदरेन हें राष्ट्रीय पुस्तक प्रदर्शन समाजा खातीर एक मोलादीक देणीं आसा.
ह्या प्रदर्शनाचें एक आकर्शण म्हणल्यार सनातन संस्थेचो पुस्तक स्टॉल. फाटल्या 25 वर्सां सावन उजवाडाक येवपी अध्यात्म, राश्ट्ररक्षण, भुरग्यांचेर संस्कार आनी भारतीय संस्कृती विशींची ग्रंथसंपदा हांगा पळोवंक मेळतली. हीं पुस्तकां वाचकां मदीं माहिती, वैचारिक जागृताय आनी समाजीक जाणविकाय निर्माण करतात. ह्या वर्साच्या पुस्तक प्रदर्शना विशीं आनी थंय मेळपी सनातन संस्थेच्या पुस्तकां विशीं म्हाका हालींच माहिती मेळ्ळी. ह्या प्रदर्शनांत पयलेच फावट इतलीं वेगळीं पुस्तकां पळोवपाक मेळटलीं, जीं सादारणपणान हेर कडेन मेळनात.
कांय पुस्तकां आधुनीक भारतीय समाजाचें खरें दर्शन घडोयतात, जाल्यार कांय कथा सांगपाच्या पद्दतीन आनी थळाव्या अणभवांनी वाचप्याक खिळोवन दवरतात. कांय पुस्तकां वाचप्याच्या मनांत कुतूहल निर्माण करतात, जाल्यार कांय पुस्तकां पालकत्वाच्या प्रवासा खातीर एक व्हड मार्गदर्शक थारतात. बालसंस्कार आनी वाचनसंस्कृतीचो पांय या पुस्तक प्रदर्शनाचो एक मुखेल उद्देश म्हळ्यार ल्हान पिरायेरच वाचनाची आवड निर्माण करप. भुरग्यांखातीर खाशेले बालसाहित्य, संस्कारक्षम कथा, चित्रमय पुस्तकां आनी मार्गदर्शक पुस्तकां हांगा मेळटली. पालकांनी स्वता वाचचें आनी भुरग्यांकय वाचपाखातीर उर्बा दिवची, होच ह्या महोत्सवाचो खरो संदेश आसा.
पणजेतलें हें राष्ट्रीय पुस्तक प्रदर्शन गोंयचे संस्कृतीक जिणेंत मोलाची भर घालपी थारतलें. दरेका साहित्यप्रेमीन, विद्यार्थ्यांन, पालकान आनी ज्ञानाची भूक आशिल्ल्या दर एका मनशान हे ज्ञानयात्रेक भेट दिवची, अशें हें तोखणाय करपा सारकें आयोजन आसा.
प्रमिला प्रसाद फळदेसाय
9011834847
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
