भांगरभूंय | प्रतिनिधी
भारतान वॅस्ट इंडिजा आडची पयली टॅस्ट एक डाव आनी 140 धांवड्यांनी जिखली. ह्या जैतान भारतान 1-0 अशी आघाडी घेतली. वॅस्ट इंडिजान पयलीं बॅटिंग करतना पयल्या डावांत फकत 162 धांवड्यो केल्ल्यो. ते उपरांत भारतान आपलो पयलो डाव 5 बाद 448 धांवड्यांचेर घोशीत केल्लो. अशे तरेन भारताक 286 धांवड्यांची म्हत्वाची आघाडी मेळिल्ली. तिसऱ्या दिसाच्या दुसऱ्या सत्रांत वॅस्ट इंडिजाचो दुसरो डाव फकत 146 धांवड्यांचेर सोंपलो. अशे तरेन भारतान अडीच दिसांनी मॅच जिखली.
वॅस्ट इंडिजाच्या ओपनरांनी दुसऱ्या डावांत खेळपट्टीचेर तग धरपाचो यत्न केलो. पयल्या सात ओव्हरी मेरेन तांणी जम बसोवपाचो यत्न केलो. पूण, आठवे ओव्हरीच्या दुसऱ्या बॉलाचेर तेजनारायण चंद्रपॉल बाद जालो. मोहम्मद सिराजाचे बॉलिंगेचेर नितीश रेड्डीन डायव्ह मारून ताची कॅच धरली. ते उपरांत आयिल्ल्या रवींद्र जडेजान विंडिजाची बॅटिंग फळी गडगडावन उडयली. पळयता पळयता जडेजान तीन विकेटी घेतल्यो. जेवणाच्या विसवा मेरेन विंडिजान 5 विकेटी व्हगडायल्यो.
एेलेक एेथनेज आनी जस्टिन ग्रिव्स हांचे मदीं 46 धांवड्यांची भागिदारी जाली. हे जोडयेन सुमार 15 ओव्हरी मेरेन भारताक विकेटी खातीर वाट पळोवपाक लायली. दुसऱ्या सत्रांत वॉशिंग्टन सुंदरान एेथनेजाक बाद करून ही जोडी फोडली. उपरांत सिराजान एकेच ओव्हरींत दोन विकेटी घेवन विंडिजाची हार लागीं लागीं निश्चीत केली. जडेजान दुसऱ्या डावांत चार विकेटी घेतल्यो.
मॅचीच्या पयल्या दिसा सिराजान उत्कृश्ट बॉलिंगेचें प्रदर्शन केल्लें. ताणें चार विकेटी घेवन विंडिजाक व्हड धांवसंख्या उबारपा पसून आडायिल्लो. जसप्रीत बुमरान ताका बरी साथ दितना तीन विकेटी घेतिल्ल्यो. विंडिजाचो पयलो डाव फकत 44.1 ओव्हरींनी सोंपिल्लो. कुलदीप यादवान दोन विकेटी मेळयिल्लो.
भारता वतीन पयल्या डावांत लोकेश राहुल, ध्रूव जुरेल आनी रवींद्र जडेजा हांणी शेंकडे मारले. जाल्यार मुखेली शुभमन गिलान अर्द शेंकड्याची खेळी केली.
मॅन ऑफ प्लेयर म्हणून रवींद्र जडेजाची निवड केली. ताणें 104 धांवड्यांची नाबाद खेळी केली तशेंच दुसऱ्या डावांत चार विकेटी घेतल्यो. दुसरी टॅस्ट 10 ऑक्टोबरा सावन दिल्लींत सुरू जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
