भांगरभूंय | प्रतिनिधी
65.700 हजार मिटर कोमुनिदाद जमनीची भानगड; ‘एसआयटी’ कडेन 11 जाणां आड कागाळ
भांगरभूंय । प्रतिनिधी
दिवचलः अडवलपाल कोमुनिदाद समितीच्या पांच पदाधिकाऱ्यांनी कोमुनिदादीचे मालकीची सर्वे क्र 25/0 तली 65 हजार 700 मिटर जमीन थेट आपल्या घरच्यांच्या नांवाचेर केल्ल्याचें प्रकरण उजवाडाक आयलां. अडवलपाल कोमुनिदादीच्या हेर म्हाजनांनी गांवांतल्या श्री शांतादुर्गा देवळांत घेतिल्ले पत्रकार परिशदेंत हो प्रकार उक्तो केलो. ह्या वेळार व्हड संख्येन थळावे लोक हाजीर आशिल्ले.
2013 ते 2016 ह्या काळांत समितीच्या अध्यक्षपदाचेर सागर रघुनाथ गांवकार, मुखत्यार गोविंद शिवराम गांवकार, उपमुखत्यार दिलीप हरिश्चंद्र गांवकार, भांडारी अर्जुन यशवंत गांवकार, आदले मुखत्यार श्रीकांत जयराम गांवकार हे आशिल्ले. तशेंच हेर मेळून 11 जाणां आड ह्या प्रकरणांत हेर म्हाजनांनी सरकारा वतीन स्थापन केल्ले एसआयटी कडेन 11 जाणां आड कागाळ दाखल केल्या, अशी म्हायती कोमुनिदादीचे आदले अध्यक्ष नेताजी दत्ती गांवकार हांणी दिली. ह्या वेळार तांचे वांगडा श्यामसुंदर दशरथ गांवकार, पंढरी गांवकार, संदेश गांवकार आनी हेर म्हाजन हाजीर आशिल्ले.
अडवलपाल गांवांतलो 25/0 सर्वेंतलो 65 हजार 700 मिटर जमनीचो वाठार ‘घोली’ ह्या नांवान वळखतात. 2013 ते 2022 मेरेन सध्याचे समितींतले पदाधिकारीच विवीध पदांचेर आसात. 2013 ते 2016 ह्या काळांत हे समितींतल्या पदाधिकाऱ्यांनी हे जमनीचे भानगडीक सुरवात केल्ली. आपल्याक कुटुंबांतल्या वांगड्यांच्या नांवाचेर हे जमनीचे वाटे करून तांच्या नांवाचेर केल्यात. ते खातीर त्या पदाधिकाऱ्यांनी न्यायालयांत बनावट कागदपत्रां तशेंच बनावट प्रतिज्ञापत्रां लावन आपलीं नांवां घातल्यांत. कुळांचो विशय तशेंच म्युटेशन प्रक्रिया सुरू आसतनाच हो विशय आमच्या लक्षांत आयलो. ताची उपरांत चवकशी केली. म्हायती हक्क कायद्या खाला संबंदीत कागदपत्रां मेळयलीं तेन्ना तो पुराय प्रकार उजवाडाक आयलो, अशें नेताजी गांवकार हांणी सांगलें. हे जमनीचें उण्यांत उणें मोल साडे स कोटी इतलें जातलें. हे जमीन भानगडी प्रकरणांत सरकार दरबारांत कागाळ केल्या. ताचेर गंभीरपणान लक्ष दिवन कारवाय करची. तशेंच मुख्यमंत्री डॉ. प्रमोद सावंत हांणी लेगीत ह्या प्रकरणाची गंभीर दखल घेवन एसआयटी वतीन ह्या प्रकरणाची योग्य चवकशी करची आनी गुन्यांवकारां आड कारवाय करपाचे आदेश दिवचे, अशी मागणी ह्या वेळार हाजीर आशिल्ल्या म्हाजनांनी केली.
चर्चे उपरांतूच कागाळ करपाचो निर्णयः गांवकार
कोमुनिदाद जमनीचे भानगडीचो विशय गांवांतल्या लोकांच्या लक्षांत आयले उपरांत 31 ऑक्टोबराक समितीक जाब विचारिल्लो आनी रितसर पत्रूय बरयिल्लें. पूण समितीन ताचेर कसलेंच स्पश्टीकरण दिवंक ना. हे भानगडीचेर चर्चा करचे खातीर बसका आपोवपाची विनवणी केल्ली, ती लेगीत तांणी घेवंक ना. समिती हे भानगडींतल्यान पळून वचपा खातीर चोरवाटो सोदता. समिती कांयच आयकून घेना हे खातीर अखेर गांवांत पेरगांव घातलें. हो सगळो प्रकार गांवकारांचे नदरेक हाडून दिलो. चर्चे उपरांत भानगडी करपी समितींतल्या पदाधिकाऱ्यांचेर संबंदीत अधिकारी, खात्यां कडेन तशेंच एसआयटी कडेन कागाळ दाखल करपाचो निर्णय घेतलो, अशें नेताजी गांवकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
