भांगरभूंय | प्रतिनिधी
अबकारी खात्याची एकट्याचेर दंडात्मक कारवाय
भांगरभूंय । प्रतिनिधी
वाळपयः सत्तरी म्हालांत काजू मोसमाक सुरवात जाल्या. कांय भाटयांनी सोरो काडपाकूय सुरवात जाल्या. मात खूबशे कडेन सोरो काडपा संबंदांतलो परवानो अबकारी खात्याच्या संबंदीत विभागान दिवंक ना. हे संबंदांत आयिल्ल्या खूबशा कागाळींची विशेश दखल घेवन वाळपय अबकारी खात्याच्या पंगडान 23 फेब्रुवारीक अडवय देसायवाडी वाठारांत धाड घाली आनी सुरेश काटेकार हाचेर दंडात्मक कारवाय केली. अशे तरेची कारवाय सत्तरी म्हालांतल्या हेर वाठारांनीय करतले, अशी शिटकावणी अबकारी खात्याच्या पंगडान दिल्या. सत्तरी म्हालांत खूबशा वाठारांनी परवानो घेनासतना भाटयो लायल्यात, अशी म्हायती मेळ्ळ्या. हे संबंदांतलें सर्वेक्षण रोखडेंच हातांत घेतले. अशा बेकायदो भाटयांचेर दंडात्मक कारवाय करतले. परवानो घेतिल्ल्या भाटयांक लागून सरकाराक व्हड प्रमाणांत महसूल मेळटा, पूण महसूल बुडोवपाचें काम अशें तरेन चल्लां. हे खातीर अबकारी खात्याच्या मार्गदर्शक तत्वां प्रमाण ही दंडात्मक कारवाय हातांत घेतले, अशें अधिकाऱ्यांनी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
