अडवय दिसलो मलबार ट्री निम्स फुलपाखो
भांगरभूंय | प्रतिनिधी
वाळपय : अस्तंत घांटाच्या गिरेस्त वाठारांत नोंद आशिल्ल्या सत्तरी म्हालांतल्या रानांनी जायत्या तरेच्यो दुर्मीळ प्रजाती मेळटात. तातूंत फुलपाख्यांचोय आस्पाव आसा. वखदी वनस्पतीय खूब आसात. अडवय रानांत गोंय सरकारान राज्य फुलपाखो म्हूण जाहीर केल्लो मलबार ट्री निम्स हो फुलपाखो सांपडला. तो फक्त सह्याद्रीच्या दोंगरांनीच दिसता. पर्यावरण मोगी अॅड. सूरज मळीक हांकां हो फुलपाखो दिसलो. गोंयांत तो फक्त कांय वाठारांनी दिसता.
सह्याद्री दोंगर माळ ही जैवविवीधतायेचे नदरेन खूब म्हत्वाची. तातूंतल्या जायत्या जाग्यांक संवसारीक दायज थळाचो दर्जो मेळ्ळा. सुकणीं, सावदां, फुलपांखीं, झाडां, वेली, सरपटपी जीव हांच्यो शेंकड्यांनी जाती, प्रजाती हांगा मेळटात. रुबी थ्रोटेड बुलबुल, गवो, माट्टी हांकां गोंय राज्यान खाशेलो दर्जो दिला. तांची राखण करप हें राज्य सरकारान आपलें कर्तव्य मानलां.
मलबार ट्री निम्स हो अस्तंत घांटांतलो प्रदेशनिश्ठ फुलपाखो. तो एक हजार फुटां वयर दोंगरांनी दिसता. धवीं पाखां, ताचेर काळी थिपके, रेशो हाका लागून तो रोखडोच दिसता. तो आकारानूय व्हडलो आसता. अॅड. मळीक हांणी सांगलें, नर आनी मादी हांचो संबद सुरु जाता, तेन्ना ह्या फुलपाख्यांच्यो अदा ह्या वाठारांनी दिसतात. म्हाका दिसलो तो मलबार निम्स एका झाडार बशिल्लो. तो उडून हॅलिकाॅप्टरा भशेन भोंवडी करून परत थंयच येवन बसलो. थंय दुसरो फुलपाखो आशिल्लो. ती मादी- नर आसपाक जाय. दुर्मीळ फुलपाखो पळोवपाक मेळप हो म्हजे जिणेंतलो विसरपाक जावचो ना असो खीण.
ह्या वेळार पर्यावरणमोगी राजेंद्र केरकार हांचे कडेन संपर्क केलो तेन्ना तांणी सांगलें, हो फुलपाखो फक्त सह्याद्रीचे कुशींतूच मेळटा. कारण हांगा दाट रान आसा. लागींच्या रानांनी तो वता. हें राज्य फुलपाखें. पर्यावरणाची राखण करपाक जाय, तरुच ही गिरेस्त रानां संपत्त, जीव, जंतू तिगून उरतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
