अडचणी नाका उपाय काडुया

भांगरभूंय | प्रतिनिधी

कोणाचोच अपमान करिनासतना. कोणाच्याच मनांक दुखयनासतना आमकां जगूंक येवंक जाय. जायत व्हय आमचें कडेन.

डिसेंबराचें निमाणें सप्तक म्हणल्यार कलकल सुट्टा.  कितलेशेच अपघात ह्या म्हयन्यांत घडटात. मागीर बेठेच मन हुस्क्यान बुडटा. कित्याक तर वर्स सोंपता आनी नवें वर्स उदेंवपाचे उमेदीन जण एकल्याचे मन खोशयेन उंचाबळ जाल्लें आसता, लोकांक कितें करूं आनी कितें नाका अशें जाता. बेठीच उमेद. तरणाटे भरधांव गतीन गाडयो रमरमरयतात. नवें वर्स म्हणल्यार गोंयांत पर्यटन उद्देगाक तेजी. जगभरांतलो लोक जिवाचो गोवा करपाक गोंयांत येतात आनी आमी भोंवपाक गोंया भायर वतात. कोण दर्यार, दोंगरांनी, फार्मांनी पिकनीक बी करपाचें बेत रचतात. 31 डिसेंबराक धुमशेण, पार्ट्योच पार्ट्यो. पूण सगलेच कडेन न्हय आं. फाटलीं कितलिंशींच वर्सां सत्तरींत आमचो पंगड ही संस्था हो दीस खेरीत पद्दतीन ‘संकल्प दीस’ म्हूण मनयता. एकदंरीत मौज मजा करपाचे हे दीस. पूण सांबाळून. उमेदीच्या भारान जिवाक जपपाक जाय. हालिंसारा लोक पयशांक लागून कितेंय करतात. मध्य भारतांतले आनी उत्तर भारतांतले पर्यटक गोंयचे दर्या पळोवन अती उंचाबळ जातात आनी दर्यांत घालून घेतात. पेंवपाक येवं वा ना येवं. कांय जाण ल्हान ल्हान बोटींनी दर्या सफरी करतात. केन्ना केन्ना त्या बोटींनी तांकी परस चड लोकांक भरतात आनी उपरांत नकळटा अपघात जाता आनी मनशांक जीव व्हगडावचो पडटा.
हालींच मुंबय घडिल्ल्या बोट अपघातांत 13 जणांचे बळी गेले. जाल्यार गोंयांत कळंगूटे ल्हान बोट उमथून एकलो सोंपलो. सोंपलो तो आनी ताचे कुटुंब तिरुपती देवदर्शनाक वचपाचें आशिल्लें तांचे मदल्या कोणाकतरी दिसलें, गोंयांत पावल्याच न्हय, बिचार मात्शीं भोंवून येवया, बोट सफर करुया, पूण खंयचे कडेन काय ना. इल्लिशी चूक केन्ना केन्ना जिवार बेतता. मुंबयच्या बोट अपघातांत एका कुटुंबान डॉक्टराचो अॅपोयंटमेन्ट घेतिल्लो. ती मात्शी बेगीन पावलीं, म्हणून तांणी बोट सफर करपाचें चितलें आनी आवयक आनी तिच्या 7 वर्साच्या भुरग्याक जीव व्हगडावचो पडलो. नशिबान 3 वर्साचो तिचो ल्हान भुरगो आनी घोव वाटावलो. नाजाल्यार आख्ख्यें कुंटुंब सोंपपाचें. असल्यो बातम्यो आयकतकच वा वाचतकच संवेदनशील मनीस अस्वस्थ जाता. खिणांत हांसपी खिदळपी कुंटुबाचेर मरणसया पातळटा हाका कोण कारणिभूत?
खरें म्हणल्यार हाचेर शासनान बरीक नदर दवरपाक जाय. मनशाचो जीव घाताक घालपी लोकांचेर खर कारवाय करपाक जाय. मनशाच्या जिवाची काळजी वेवसाय करतल्यांनी घेवपाक जाय. बेफिकरपणा चलचिना.
हाचेर शासनान कडक धोरण आपणावपाक जाय. आयज काल कोणाकूच कोणाचें पडून गेल्लें ना.
आमी समाजांत रावता म्हणटकच समाजांत बरें वायट कितें घडटा तें आमकां लागपाक जाय. आमचें मन संवेदनशील आसपाक जाय. दुसऱ्याच्या दुख्खान आमकां रडपाक येवंक जाय. आमच्यो संवेदना बोथट जावंक फावना. आमी मनीसपणानूच सगल्यांचो विचार करपाक जाय. कोणाचोच अपमान करिनासतना. कोणाच्याच मनांक दुखयनासतना आमकां जगूंक येवंक जाय. जायत व्हय आमचें कडेन. चाटे पावलाक आयज मनशाच्या मनांत दुस्वासाचोच घयरांव दाटिल्लो आसा, तो आदीं निवळ करपाक जाय.
कोण तरी आपले बाबूक बरो म्हणटना, दुसऱ्याल्या बाबूची कुतां काडटा, ताका हिणसायता, ताचो अपमान करता, आनी आमी सगले वोगी रावतात हें समा न्हय. तूं तुगेल्या बाबूक तोखेवचोच पूण दुसऱ्याल्या बाबूक उणाक लेखूं नाका. जाणकारांक सोबना हें. कितें आसता, कितेंय मोठे भोपशें मेळ्ळें म्हणटकच मनशाक ही उमेद जाताच. म्हणून मनशान हेवेंत उडूंक फावना. इल्ल्याशा जैतान मनशान आपणें मळब वेंगायलें हे भावनेन वागूंक जयाना. केन्ना भोपशे मेळिल्लो मनीस आपलें पांय जनिरूच दवरून आसता. पूण भलतेच लोक ताचो गैरफायदो घेवन ताकाच नखलामी करतात, तें पळोवन वायट दिसता. असल्या कालेतीच्या मनशाक किंम्मत दिवंक जायना. तें जे कितें बडबडटा तें सोडून दिवपाक जाय. मनीस म्हूण समजांत वावुरतना सदांच दुसऱ्यांक मान सन्मान दिवपाक शिकपाक जाय. उलयतना सभ्य भास वापरपाक जाय. गरजे भायर कोणा तोंड दुबळ्याक दोशी थारावन आपूण खोरमडे जावंक जायना. दुसऱ्यांक पावणेर काडचे आदीं आपूण कितलो परफेक्ट आसा हें तपासून पळोवंक जाय. आपुणूच शाणो म्हणलो म्हूण जायना. काम करता तो चुकतोलोच, म्हूण चुकतल्यांचीच फाट धरून उपकारना. उपाय काडपाक जाय. जरावाजी करून कसलोच फायदो ना. पूण आयचो जमानो चोर सोडून संन्याशाचेच फाटीक लागता. काम करतल्याकच धोंसता. पांयार पांय उडोवन बसून पगार खावप्यांक कोण ख्यास्त करिनात. काम चुकाऱ्यांकच लोक माथ्यार घेतात. असल्या समाजा कडेन मात्सो तिरसुवादानूच वागचो पडटा तेन्नाच समाज जागो जाता.
केन्ना केन्ना आमी दुसऱ्यांची चुकीची बाजू मीठ मसालो लावन व्हडली करून लोकां मदीं फा फूं करतना आमी नाण्यांची दुसरी बाजू केन्नाच सारखी सांगना, कित्याक आमकां ते व्यक्तीक चडांत चड बदनाम करपाचो आसता, आनी पोकळ कानाचे लोक भितरले खरेपण तपाशिनासतना ते सांगता तेंच खरें मानपाक लागतात. म्हणून केन्नाय बी नाण्यांच्यो दोनीय बाजू तपासुनूच निर्णय घेवप आसता. केन्ना केन्ना आमी इतले बुद्दिमान आसून लेगीत सामकें गलगल्याक आयिल्ले वरी वागतात. आमी अशे निर्णय घेतात की आमी आमचेच नाक पावणेर काडटात. आमी आमकांच उणाक लेखतात आनी धरकल फावो नाशिल्ल्या मनशाक कालू काडून दिता. सामकेंच एकदम सकयल्या पांवड्यार आमी देंवूंक फावना. आमी चिल्लर जावंक फावना. आमी आमची विद्वत्ता कोणायच्या हातांत दिवंक फावना. आपल्याच तोडीच्या मनशा कडेन दिवंक जाय. सामकोच सवाय जावंक जायना. आपले म्हत्व आपणेंच रवाडोवचें आसता. केन्ना केन्ना कितें जाता नडणीं खंयूय पावूं कोण्णो बरो आसूंक जाय. आपल्या म्हालाची आपणेंच जायरात करची आसता. आमी आमच्या म्हालाची जायरातूच केली ना जाल्यार लोकांक कशें कळटलें? कोणूय म्हणल्यार म्हणूं हो आपलीच जायरात करता म्हूण. जायराती बगर कसलोच म्हाल खपना इतलें मात खरें.
कांय लोकांक कांयच पडून गेल्लें आसना. नकारात्मकताच घेवन जगतात. हें करूं नाका आनी तें करूं नाका. पूण कितें कर तें सांगना. वा कितें करुया तें सांगना. अडचणीच सांगतलो उपाय सांगचो ना हें बरोबर न्हय.
प्रत्येक प्रोब्लमाक सोलुशन हें आसताच. गोवा बोर्डाचे चेरमेन भगिरथ शेटये सर सदांच सांगतात प्रोब्लम सांगू नाका सोलुशन सांग. जशें प्रत्येक प्रस्नांक उत्तर हें आसताच. म्हणून म्हणटा “शोधा म्हणजे सापडेल”

काशिनाथ नायक
9158345844