भांगरभूंय | प्रतिनिधी
गोविंद गावडे : क्षत्रीय पागी समाजान मनयलो वर्धापन दीस
भांगरभूंय । प्रतिनिधी
काणकोण : स्वताची उदरगत करपाची आसा जाल्यार जागेपणी सपनां पळोवन ती साकर करचे खातीर सक्रीय जायात. ताचे मुखार येवपी आडखळी, अडचणी हांचेर जितलें जैत जोडटले, तितलेच तुमी सक्षम आनी येसस्वी जातले, अशें कला आनी संस्कृती मंत्री गोविंद गावडे हांणी सांगलें. अखील गोंय क्षत्रीय पागी समाज संघटणेची सरकारी पांवड्यार नोंद जावन 40 वर्सां जाल्ले निमतान संघटणेन सागर कला मंथन हे कार्यावळीचें आयोजन केल्लें. हे कार्यावळीच्या समारोप सुवाळ्यांत मंत्री गावडे मुखेल सोयरे म्हूण उलयताले.
ह्या वेळार माचयेर नुस्तेमारी मंत्री नीळकंठ हळर्णकार, वास्कोचे आमदार संकल्प आमोणकार, उद्देजक राजेश तारकार, नगरसेवक शुभम कोमरपंत, समाजाचे अध्यक्ष दिवाकर पागी, सचीव रुद्रेश नमशीकार, समीर काणकोणकार हाजीर आसले.
ह्या वेळार मंत्री हळर्णकार, आमदार आमोणकार हांचींय भाशणां जालीं. हे कार्यावळींत शिक्षण आनी कला मळार विशेश कामगिरी केल्ल्या व्यक्तींचो मानेस्तां हस्तुकीं सत्कार केलो. पंकज नमशीकार आनी अश्मी पागी हांणी कार्यावळीचें सुत्रसंचालन केलें.
सकाळच्या सत्रांत जाल्ले कार्यावळींत काणकोणचे आमदार तशेंच सभापती रमेश तवडकार हाजीर आसले. तांणी ह्या वेळार सांगलें, शिकिल्ल्यो व्यक्ती शारांत गेल्यो आनी तांणी गांवा कडेन फाट केली. अश्या वेळार आदली ग्रामीण वेवस्था तिगयतनाच शेणिल्लें गांवपण सांबाळपाची जापसालदारकी अखील गोवा क्षत्रीय पागी समाजान आपल्या भुजार घेवची, असो उलो तवडकार हांणी मारलो.
ह्या वेळार काणकोणची नगराध्यक्ष सारा देसाय, उपनगराध्यक्ष गंधेश मडगांवकार, आगोंदचे सरपंच निलेश पागी, नगरसेवक रमाकांत ना. गांवकार, आगोंदची पंच तेजल पागी, बेतुलचे पंच किशोर नायक हाजीर आसले. ह्या वेळार समाजांतल्या विवीध मळांचेर येस मेळयल्ले समाज भाव तशेंच यत्ता 10 वी, 12 वी आनी हेर परिक्षांनी विशेश श्रेणी मेळयल्ल्या गुणेस्त विद्यार्थ्यांक प्रशस्तीपत्रां, मानपत्रां दिवन भोवमानीत केले. भोवमान केल्ल्यां मदीं अनिकेत गानू पागी, रिद्वी पागी, यश चंद्रहास पागी, साची संतोष पागी, पलक तुळशीदास पागी, संयुक्ता रामा पागी, सायली संदीप पागी, श्रेयन संदीप पागी, स्वयंम समीर पागी, शाम राजू पागी, सानिका रमेश नायक, अपेक्षा आनंद नमशीकार, सोहम साहीर मडगांवकार, स्वयं शिवानंद पागी, वैष्णवी प्रकाश पागी, अपेश दिलखुश नायक, चिराग प्रशांत काणकोणकार, सानवी राधाकृष्ण पागी, वेदांत श्रीपाद पागी आनी साक्षी रवींद्र पागी हांचो आस्पाव आसलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
