भांगरभूंय | प्रतिनिधी
चिंतन – 28
जिवीत हें फकत स्वास घेवपा पुरतें नासता; तें एका ठाम नेम, ध्येय आनी जापसालदारकेन सजलें काय खरें जगप जाता. नाजाल्यार आमी गर्देंतल्या शेणिल्ल्या मुखामळा सारके – अस्सल वळख नासलेले, दिशाहिन भरकटत रावतात.
तुका म्हणे जिणे l
शर्तीविण लाजिरवाणे ll
तुकोबा म्हणटात, मनशाचें जिवीत नेम निर्धारान सोबता, त्या नेम निर्धार बगर, अटी नासतना जगप लजेक घालपी आसा.
ईशान्य भारतांतल्या मणिपूरांतल्या एका ल्हान गांवांत जल्मल्ली मेरी कोम सादारण गांवगिरे चलयेचें जिवीत जगताली. पूण तिच्या मनाच्या एका कोनशांत तिचें एक सपन आशिल्लें – बाॅक्सिंगेत भारताचें नांव संवसारांत चमकवप. तिचें हें सपन सोंपें नाशिल्लें. गांवांत खेळां खातीर सुविधा नाशिल्लीं, बाॅक्सिंग हो बायलांचो खेळ मानच नाशिल्ले आनी कुटुंबाची अर्थीक स्थिती वायट आशिल्ली. पूण तिणें स्वताकूच एक ‘अट’ घाली – “कितलेय आडमेळे आयले तरी हांव हार मानचें ना.”
दर दिसा फांतोडेर ती घरांतलें काम करून मैलाचे मैल धांवताली, गांवांतल्या ल्हानशा जिमांत पोरणे बाॅक्सिंग ग्लावज घेवन सराव करताली. केन्ना केन्ना तिका लोकांच्या थोमण्याक तोंड दिवचें पडटालें – “चलयांनी घरांतलें काम करचें, बाॅक्सिंग कसलें खेळटा?” – पूण तिणे अट मोडली ना.
मेरी कोम जायत्या सर्तींनी हारली, पूण दर खेपे ती परतून उबी रावली. ल्हवू ल्हवू तिच्या कश्टाक फळ मेळ्ळें – ती पांच फावटीं संवसारीक जैतिवंत, ऑलिंपिक पदक जैतिवंत आनी लाखांनी भारतीय चलयां खातीर प्रेरणा थारली.
मेरी कोमाचें जिवीत आमकां शिकयता – शिस्त आनी निर्धार नासतना यश ना.
ती म्हणटा – “तुका कोणाक सांगूंक दिवं नाका, की तुका कांय जमना.”
होच तुकोबाच्या वाक्यांचो आधुनीक अणकार – कारण अटीं बगर जिवीत म्हणल्यार ल्हारां वयल्यान व्हांवत वचपा सारकें, जाल्यार अटींचेर जगप म्हणल्यार स्वताची दिका थारावन प्रवास करप.
अटीं बगर जगप म्हणल्यार हेतू नासतना धांवप. कितलेंय धांवले तरी आमी खंय पावल्यात हाची जाणीव आमकां जायना. तुकोबा म्हणटात, हें लजेक घालपी, कारण मनशाक विचारशक्त, निर्धार आनी ध्येय दिलां– तें वापरप ना हो आमच्या मनीसपणाचो अपमान.
आमी कितें करूं येता? आयजच स्वताक प्रामाणीक अट घालात.. तो चड व्हडली नासली तरी चलता – पूण ती पाळात. कारण खरो प्रतिश्ठा म्हणल्यार दुसऱ्यांक दाखयल्ली चमक न्हय, तर स्वताक दिल्लें उतर पुराय करप. हाकाच लागून जिवीत अर्थपूर्ण जातलें.
– हभप देवदत्त दिगंबर पारुळेकर
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
