भांगरभूंय | प्रतिनिधी
विदेशी कायदो मोडिल्ल्याचो आरोप
म्हापशेंः खांपो ड्रग्स डीलर अटाला उर्फ यानिव्ह बेनाहीम (५०, रा. शिवोली) ह्या इझ्रायली नागरिकाक बिराडकार म्हणून दवरतना विदेशी विभागीय नोंदणी कार्यालयाक (एफआरआरओ) म्हायती दिवंक ना. ह्या प्रकरणांत विदेशी कायदो पाळूंक नाशिल्ल्या आरोपाखाला शिवोलेच्या अपार्ट धनी परम उल्हास वर्टी (३६) हाचे आड हणजूण पुलिसांनी गुन्यांव नोंद केला.
मार्ना, शिवोलेच्या कासा ज्युलियाना अपार्टमेंटाच्या बी व्हिंगांतल्या फ्लॅटांत दुबावीत अटाला उर्फ यानिव बेनाहिम हो फाटल्या चार म्हयन्यां सावन बेकायदो रावतालो. परदेशी नागरिकाक बिराडाक दवरतना पणजेच्या विदेशी प्रादेशीक नोंदणी कार्यालयाक ऑनलायन सी फॉर्म भरून म्हायती दिवप गरजेचें आसा. तरी दुबावीत धनयान हो अर्ज भरूंक ना. हाका लागून दुबावितान विदेशी कायद्याचे नेम मोडल्यात. हाका लागून परदेशी नागरीक कायद्याच्या कलम १४ (क) खाला हणजूण पुलिसांनी परम वर्टी हांचे आड गुन्यांव नोंद केला. हे विशीं फुडलो तपास पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
