भांगरभूंय | प्रतिनिधी
पणजीः अटल सेतू वयल्या रस्त्याचें दुरुस्तीकाम चालू आसा. ताका लागून पूल बंद दवरपाचो निर्णय प्रशासनान घेतला. काम पुराय जाय मेरेन पूल बंद उरतलो, असो आदेश येरादारी पुलीस अधिक्षक बोसेट सिल्वा हांणी जारी केला. अटल सेतू बंद आशिल्ल्यान पणजी बसस्टॅण्डा लयत पर्वरी येरादारेची कोंयडी जावपाक लागल्या.
अधिवेशना आदीं अटक सेतू बंद आशिल्लो. ताका लागून येरादारेची पणजे कोंयडी जाताली. अधिवेशना वेळार अटल सेतू उक्तो केल्ल्यान इल्ली थाकाय मेळ्ळी. आतां काम सोपा मेरेन अटल सेतू बंद उरतलो. विद्यार्थी, नोकरेक वचपी तशेंच हेर लोकांनी अटल सेती बंद आसा हें समजून घेवन येरादारीचें नियोजन करचें, अशें येरादारी फाट्यान कळयलां. पणजे स्मार्ट सीटीचीं कामां चालू आसात. मंत्री तशेंच पणजीचे आमदार बाबूश मोंसेरात हांणी सोमारा स्मार्ट सीटीच्या कामाची पळोवणी केली. ह्या कामांक लागून कला अकादमी, चर्च वाठार, सांत इनेज, काकुलो मॉल वाठारांत येरादारीची कोंयडी जावप चालूच आसा. एप्रीलांत जी 20ची परिशदेची पयली बसका पणजे जातली. ताचे आदीं हीं कामां पुराय करपाचो यत्न सा. पणजे भितरल्या रस्त्यांचीं कामां मात चालूच उरतलीं. अटल सेतूक लागून वास्को- म्हापशें, फोंडें- म्हापशें, फोंडें- वास्को ह्या मार्गा वयलीं चार चाकी वाहनां थेट पुला वयल्यान वताली. ती पणजी बसस्टॅण्डार येनाशिल्ली. हाका लागून मांडली पूल तशेंच बसस्टॅण्डाचेर गाडयांची गर्दी जायनाशिल्ली. आतां सगळ्याच गाडयांक पणजी बसस्टॅण्डा सयत मांडवी पुलाचेर येरादारीची कोंयडी जाता. सोमारा पर्वरी वाठारांत व्हड प्रमाणांत येरादारीची कोंयडी जाल्ली. अटल सेतूचें काम पुराय जाय मेरेन आतां सकाळीं आनी सांजे वेळार पणजेंतले कोंयडेक लागून वाहनचालकांचे हाल जातले हें निश्चीत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
