भांगरभूंय | प्रतिनिधी
भांगरभूंय । प्रतिनिधी
पणजीः अटल सेतू दुरुस्तीच्या कामाक लागून पणजे आनी पर्वरी व्हडा प्रमाणात येरादारीची कोंयडी जाता. पुला खातीर खर्च केल्ले कोट्यांनी रुपये उदकांत गेल्यात अशी टिका युथ काँग्रेसाचे उत्तर गोंय अध्यक्ष रिनाल्डो रोझारियोन केल्या. भाजपा सरकारान अटल सेतूचेर 600 कोटी रुपयां परस चड खर्च केला. 2019 वर्सा पुलाचें उक्तावण जाल्या उपरांत वर्स भरयां ताचेर फोणकुलां पडलीं अशें रिनाल्डोन सांगलें.
पोर्तुगेज तेपा वयले पूल अजून बरे आसात. भाजपा राजवटींतले रस्ते आनी पुलांची मात वर्सभरयांत डागडुजी करची पडटा. अटल सेतू हो गोंयची वळख जावची हे खातीर सरकार धडपडटालें मात ह्या पुलाची सद्या अवतिकाय जाल्ल्यान सरकार उक्तें पडलां. सरकाराच्या घाळपणाचें मोल सध्या पर्वरी राववी लोकांक दिवचें पडटा. पर्वरी तें मेरशे मेरेन अटल सेतू दुरुस्ती खातीर येरादारीक बंद केल्ल्यान ताचो फटको येरादारीचेर बसला अशें ताणे सांगलें.
कर्मचारी आनी विद्यार्थ्यांक सध्या जो त्रास जाता. तो उणो करपा खातीर सरकारान कसलीं पावलां घातल्यांत हें सांगचें अशें रिनाल्डोन सांगलां. स्मार्ट सिटीच्या नांवा खाला पणजे सध्या जें कितें चल्लां. जी20 परिशदेक लागून रस्त्यांचें डांबरीकरण सुरू आसा. ताका लागून येरादारीची कोंयडी जाता. सरकारांतले मंत्री आनी सरकारी अधिकाऱी लोकांक जे त्रास जातात ताचें कांयच पडून गेल्लें ना. सगळो सुस्त कारबार चल्ला असो आरोप ताणे केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
