अटल जिल्हो

भांगरभूंय | प्रतिनिधी

नव्या जिल्ह्याची निर्मणी ही प्रशासकी सुविधे खातीर जाता.

अखेर तिसरो जिल्हो करपाचेर सगल्या लोकप्रतिनिधींचें एकमत जालें. धारबांदोडें, सांगें, केपें आनी काणकोण तालुक्यांचो आस्पाव आशिल्ल्या ह्या जिल्ह्याचें नांव आदले प्रधानमंत्री अटलबिहारी वाजपेयी हांच्या नांवा वयल्यान ‘अटल’ अशें दवरलां. केपें हें मुख्यालय. सांवड्डें, केपें, धारबांदोडें, कुडचडें, काणकोण आनी सांगें मतदारसंघ ह्या जिल्ह्यांत येतात. तिसरो जिल्हो करप सगल्यांक मान्य आसलें, तरी हे विशीं बारीकसाणेन अभ्यास जावंक जाय, अशें विरोधकांनी म्हणलां. जिल्हो स्थापन करपाक खासा नेमिल्ले समितीचो अहवाल उक्तो करिनासतना ताकतिकेन हो निर्णय जाहीर केला, अशेंय तांचें मत. राष्ट्रीय पांवड्याचेर लोकसभा मतदारसंघांची फुडाराक फेरचणूक जाली जाल्यार आनीक एका गोंयकाराक खासदार जावपाची संद मेळूं येता. पूण लोकसंख्या वाडल्यारूच!
निती आयोगान देशांत ल्हान जिल्हे स्थापन करपाची शिफारस केल्ली. व्हडल्या राज्यांनी उदरगत ही फक्त थारावीक म्हानगरां, शारां, उपरनगरां पुरतीच मर्यादीत उरता. कांय जिल्हे वा वाठारांचीच उदरगत जातात. मागीर मागास तालुक्यांतले लोक त्या शारांचे दिशेन धांवपाक लागतात. कारण गांवांत रावन ते पोट भरपाक शकनात. शेजारी महाराष्ट्र, कर्नाटकाचो अभ्यास आशिल्ल्यांक हें वेगळें सांगपाक नाका. सगल्यांत चड धपको बसता तो शिमे वयल्यान गांवांक. विकासाची गंगा थंय वर्सांचीं वर्सां पावचना. डांबरी रस्ते सोडात, गाडयो पसून पळोवंक नाशिल्ले गांव आमच्या देशांत आसात. निती आयोगाचे शिफारसी वयल्यान देशभरांत 120 नवे जिल्हे स्थापन जाल्यात. गोंयांत अटल जिल्हो जाला तो ताकाच लागून. कांय वर्सां सावन धारबांदोडें जिल्हो करपाची मागणी जाताली. विधानसभेंत, मंत्रीमंडळ बसकेंतूय ताचेर चर्चा जाल्ली. नव्या जिल्ह्याची निर्मणी ही प्रशासकी सुविधे खातीर आसता. तरीय उदरगतीच्या कामांक लागून राज्याक केंद्रा कडल्यान निधी मेळूं येता.
गोंयांत लोकमेजणी जावन 14 वर्सां जाल्यांत. तेन्नाची लोकसंख्या आशिल्ली साडेचौदा लाख. मात, आतां ती वाडून 20 लाखांक तेंकल्या आसतली. भितर घडये फक्त 9 लाख गोंयकार आनी 11 लाख परप्रांतीय आसत! नव्या जिल्ह्याची लोकसंख्या फाटले लोकमेजणे प्रमाण, दोन लाख आसा. केपें तालुको 81 हजार आनी सांगें 65 हजार हे लोकसंख्येंत मुखार आसात. मतींत घेवपाची गजाल म्हणल्यार हे सगले तालुके सैम, शेतां, भाटां, दोंगरांनी नटिल्ले. हेर तालुक्यांचे तुळेन हांगा लोकसंख्या उणी. अनुसुचीत जमातीच्या लोकांचो आंकडो सरकारी अहवाला प्रमाण, सादारण 28 टक्के आसा. तो मुद्दो मुखार केल्यार उदरगतीच्या नांवान केंद्र सरकारी येवजण्यो आनी निधी वाडोवन मेळूं येता. एसटीं खातीर येवजण्यो, ग्रामविकास, भलायकी, शिक्षण ह्या मळां वयले निधी प्राधान्य मेळूं येता. जिल्हो मुख्यालय केप्यां केल्ल्यान कांय तालुक्यांतल्या लोकांक थाकाय मेळटली. उदक, वीज नियोजीत पद्दतीन मेळची. पुलिसां वयलें कामाचें वजें उणें जावचें, सरकारी कामां खातीर लोकांक चड पयस प्रवास करचो पडचो न्हय, म्हूण व्हडल्या राज्यांतल्या जिल्ह्यांचो आंकडो वाडयतात. गोंयचो एकूणच आंवाठ पळयल्यार हांगा लोकांक तश्यो व्हडल्योश्यो समस्या येनात. आतां हांगा विवीध सरकारी कार्यालयां येतलीं.
नव्या जिल्ह्यांत प्रशासना वयलो ताण उणो जावंक जाय. ताची कार्यक्षमता वाडूंक जाय. प्रशासकी कामाक वेग आयल्यार थळाव्या समस्यांचेर बेगीन उपाय मेळूं येतात. हांगा उदरगती खातीर बरेंच काम करप शक्य आसा. मात, सैमाचो सांबाळ करून. कारण हो जिल्हो रानांनी भरिल्लो. कुळागरां, भाटांय आसात. रानवटी सावदां, सुकणीं, जीव हांगा चड. ही सैम सोबितकाय कायम तिगून उरतली, हाचे कडेन मात लोकांनी आनी सरकारानूय लक्ष दिल्यार बरें.
अधिसुचोवणी येतकच नव्या जिल्ह्याचे स्थापनेक वेग येतलो. ताचे पयलीं जिल्ह्याचेर सर्वांगी भासाभास जावप बरें. समितीन नेमकें कितें सांगलां, सुचयलां, तेंय लोकांक कळप बरें. अटल जिल्ह्याक पयलींच परबीं दिवया.