अटल आसरा येवजणेचे अर्ज निकालांत काडपा खातीर घेतले शिबिरां

भांगरभूंय | प्रतिनिधी

समाज कल्याण मंत्री सुभाष फळदेसाय हांची म्हायती

पणजीः अटल आसरा येवजणेचे स हजार अर्ज कागदपत्रांi; कटकटींक लागून आडखून उरल्यात. हे अर्ज निकालांत काडपा खातीर खाशेली शिबिरां घडोवन हाडटाले. मामलेदार आनी हेर संबंदीत खात्या वांगडा हे अर्ज एका दिसा भितर निकालांत काडून मे म्हयन्याच्या शेवटाक लावार्थ्यांक हे येवजणेचे पयशे मेळटले अशी म्हायती समाज कल्याण मंत्री सुभाष फळदेसाय हांणी दिली.

पर्वरे सचिवालयांत जाल्ले पत्रकार परिशदेंत मंत्री फळदेसाय हांणी ही घोशणा केली. ह्या वेळार खात्याचे संचालक अजीत पंचवाडकार हाजीर आशिल्ले.

अटल आसरा येवजणे खाला एसी, ओबीस आनी अर्थीक मागास (इडब्ल्यूएस) लावार्थ्यांक घर बांदपा खातीर 3 लाख आनी घर दुरुस्त करपा खातीर 1.50 लाख इतली अर्थीक मजत मेळटा अशें फळदेसाय हांणी सांगलें.

कांय कारणांक लागून ही येवजण मुखार वचनाशिल्ली आनी कागदपत्रांचे कटकटीक लागून हे अर्ज आडखळून उरताले. हे अर्ज निकालांत काडून तांकां येवजेणेचो लाव मेळचो म्हूण मुख्यमंत्र्यांनी ही येवजण सुटसुटीत करून नवी संकल्पना हे येवजणे भितर हाडली. जेणेकरून जे गरीब आसात तांकां घर बांदपा खातीर वा दुरुस्त करपा खातीर हे येवजणेचो लाव मेळचो अशें फळदेसाय हांणी सांगलें.

सरकारी, कोम्युनिदाद जमनींत घरां आसात तशेंच भाटकारांची घरां आसात तांची कागदपत्रां तयार करपाक, इडब्ल्यूएस आनी हेर कागदपत्रांची प्रक्रिया करपाक, जांकां टीसीपीचे लिसेन्स दिवपा खतीर तांकां आराखडो मंजूर करून घेवपाक ह्यो सगल्यो गरजेच्यो प्रक्रिया करूंक नाशिल्ल्या कारणांन 6 हजार अर्ज आमचे कडेन प्रलंबीत आसात अशें फळदेसाय हांणी सांगलें.

हे खातीर पुराय गोंयभर आमी विशेश मोहीम राबयतले. हातूंत समाज कल्याण खात्याचे अधिकारी दरेक मतदारसंघांनी वतले आनी थंयसर संबंदीत आमदारांक सांगतले की, तांणी मामलेदार शिबिरांत धाडचे आनी गरज पडटा तेन्ना थंयसरच तांची सय घेतले. जांचे अर्ज प्रलंबीत आसात तांकां आपयतले तांची कसलीं कागदपत्रां उरल्यात ती प्रक्रिया तेन्नाच पुराय करतले. ही सगली प्रक्रिया पुराय करपा खातीर फोटोग्राफर, झेरोक्स माक्नां दवरून मामलेदार कार्यालयाचे अधिकारी स्टॅम्प पेपर घेवन हजर आसतले. एका दिसा भितर हो विशय सुटावो करून मे म्हयन्या पयलीं तांच्या बँक खात्यांत पयशे पावतले.

ह्या शिबिरांत नवे अर्ज घेवचे नात. जांचे अर्ज कांय कराणांक लागून जांचे अर्ज अर्दकुटे उरल्यात ते अर्ज सरकारी यंत्रणां व्हरून ते अर्ज पुराय करून म्हयन्या भितर तांकां पयशे दिवपाची आमची मोख आसा. दरेक मतदारसंघात दर दिसा 200 अर्ज निकालांत काडपाची आमी मोख दवरल्या. प्रलंबीत अर्ज निकालांत काडले उपरांत नव्या अर्जा खातीर शिबीर घेतले अशी म्हायती फळदेसाय हांणी दिली.

आमी सरकारी वा कोम्युनिदाद जाग्यांत रावपी गोंयकाराक थाकाय दिवपा खातीर नवो निर्णय घेतला. जे गोंयकार 30 वर्सा परस चड हे सुवातेत रावतात तांकां घर दुरुस्त करपा खातीर अर्थीक मजत दितले.पंचायतीचो सरंपच आनी सचीव तांची वळख पटयतले आनी तांकां 30 वर्सांचो राबितो दाखलो पंचायत दितली. पूण हे सुवातेंत जांकां नवें घर बांदपाक जाय जाल्यार नगर नियोजन खात्यांत वचून तांणी मालकी हक्क घेवचो ते खातीर आमी कसलीच हमी दिवचे नात, अशे स्पश्टीकरण फळदेसाय हांणी दिलें.