भांगरभूंय | प्रतिनिधी
डॉ. चंद्रकांत शेट्ये : उरिल्ल्या अर्जां खातीर दिवचले विशेश शिबीर
भांगरभूंय । प्रतिनिधी
दिवलच : सरकार तुमच्या दारांत खाला आमचें सरकार खूबशे उपक्रम चालीक लायता. अटल आसरा येवजणे खाला गरजेवंतांक घरां बांदून दिवचे खातीर जी येवजण आसा ते येवजणेच्या उरिल्ल्या अर्जांची छाननी करतना, एका पाख्यां पोंदा सगळ्या कागदपत्रांची छाननी जावन अर्ज मान्य जावचो, हे खातीर समाज कल्याण खात्यान एका दिसाचें शिबीर आयोजीत करून एक तोखणायेचो उपक्रम सरकारान आंखला. हे वरवीं लोकां कडेन आशिल्ली बांदिलकी सरकारान दाखयल्या, अशें डॉ. शेट्ये हांणी सांगलें.
मुळगांवां समाज कल्याण खात्या वतीन अटल आसरा येवजणे खाला गरजेवंतांक आलाशिरो दिवचे खातीर देड लाख आनी हेर मजत दिवपाची येवजण आसा. ते खाला सुमार 88 अर्ज सगळीं कागदपत्रां नाशिल्ल्यान पडून उरिल्ले. तीं पुराय करचे खातीर खात्या वतीन मुळगांवां आनी दिवचले विशेश अटल आसरा येवजण मंजुरी शिबिराचें आयोजन केल्लें. ह्या शिबिरांत सगळे तरेचे दस्तावेज कागदपत्रां हे विशीं आशिल्ले दुबाव पयर करून मामलेदार, तलाठी, संबंदीत अधिकारी हांचे हाजिरेंत अर्ज मंजूर करचे खातीर विशेश शिबिराचें आयोजन केल्लें. ह्या वेळार समाज कल्याण खात्याचे अजीत पंचवाडकार, नगराध्यक्ष विजयकुमार नाटेकार, प्रदीप रेवोडकार, विवीध गांवांचे सरपंच, पंच हाजीर आशिल्ले.
अजीत पंचवाडकार हांणी समाज कल्याण कात्याच्या येवजण्यांची म्हायती दिली. ताकतिकेन अर्ज निकालात काडचे खातीर तशेंच लोकांक ताकतिकेन ही मजत मेळची हे खातीर हें शिबीर आयोजीत केलां, अशें तांणी सांगलें. हे अर्ज मंजूर करून बेगिनात बेगीन लोकांक घरां बांदपा खातीर अर्थीक मजत करतले. मात ताचो उपेग स्कुटर घेवपाक वा हेर कामा खातीर करचो न्हय, अशें डॉ. शेट्ये हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
