भांगरभूंय | प्रतिनिधी
15 जून मेरेन सगले अर्ज निकालांत काडटले, सांखळे अटल आसरा शिबिराचे आयोजन
दिवचलः अटल आसराचे सगले अर्ज 15 जून मेरेन निकालांत काडटले आनी ते तांच्या खात्यांत जमा जातले. घरां बांदपा खातीर गरजेवंतांक देड लाख रुपया दिवपाची येवजण आसा. पूण सरकारी येवजणांचो गैरवापर जाल्यार सरकार कारवाय करपाक फाटीं सरचें नात. तशेंच अटल आसरा खाला घरां बांदप. घरां बांदपाचे पुरावे सादर करप गरजेचें आसा. येवजणेच्या पयशांतल्यान भुरग्यांक गाडयो घेतल्यो जाल्यार गाडयो जप्त करून कारवाय करतले अशें मुख्यमंत्री डॉ. प्रमोद सावंत हांणी स्पश्ट केलें.
अटल आसरा येवजणे खाला समाज कल्याण खात्यान रवींद्र भवन सांखळे एक खाशेलें शिबिर आयोजीत केलें. हाचे खाला अर्ज प्रलंबीत आशिल्ल्या सगल्या खात्याच्या अधिकाऱ्यांक एकेच सुवातेर आपोवन अर्ज मंजूर करपा खातीर खाशेलें शिबिर आयोजीत केलें. हे खेपे जायत्या अर्जांक मान्यताय दिवपाची प्रक्रिया पुराय जाली.
सरकार खूब येवजण्यो आंखता, पूण आतां कांय जाण त्या येवजण्यांचो गैरफायदो घेतात हें लक्षांत आयलां. आलाशिरो जाय आनी जांची येणावळ तीन लाख रुपया सकयल आशिल्ल्यांक अटल बिहारी वाजपेयी हांच्या नांवान सरकाराची अटल आसरा येवजणे खाला देड लाख दिवपाची येवजण आसा.
तातूंतल्यो समस्या वा चुको पयस करपा खातीर राज्यभरांत अटल आसरा शिबिरां घडोवन हाडप, सगळ्या कागदपत्रांची बारीकसाणेन चवकशी करप आनी सगळ्या अधिकाऱ्यांक एकाच सुवातेर आपोवन अर्जाक मान्यताय दिवप ही समाज कल्याण खात्याची कल्पना अभिनव आसा अशें मुख्यमंत्र्यांनी सांगलें.
समाज कल्याण मंत्री सुभाष फळदेसाय हांणी मुख्यमंत्र्यांच्या विनवणी प्रमाण राज्यांतल्या वेगवेगळ्या सुवातींनी अटल आसारा शिबिरां घडोवन हाडलीं. सरकार तुमच्या दारी येवजणे खाला सगळी प्रमाणपत्रां रोखडीच मेळचीं आनी कोणाचो अर्ज प्रलंबीत उरचो न्हय हो ह्या शिबिरांचो हेत आसा. राज्यांतल्या सगल्या अर्जांचेर प्रक्रिया जातली आनी निकालांत काडटले अशें मंत्री फळदेसाय हांणी सांगलें.
ह्या वेळार समाज कल्याण खात्याचे अजीत पंचवाडकार, हेर अधिकारी, नगरसेवक, पंचायत सरपंच वांगडी आनी गांवकार हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
