भांगरभूंय | प्रतिनिधी
मुख्यमंत्री : सांखळे पोरण्यां कार्यकर्त्यांचो भोवमान
भांगरभूंय । प्रतिनिधी
दिवचल : आदले प्रधानमंत्री अटलबिहारी वाजपेयी हांचो जिवीत वावर हो संघर्शांत भरिल्लो आनी प्रेरणा दिवपी आसा. तांणी खूब कठीण प्रसगांक फुडो केलो. तांणी भाजपाक इतलें व्हड उड्डाण घेवचे खातीर प्रेरणा दिली. अटलजी ऋषीतुल्य व्यक्तीमत्व आशिल्लें, अशें मुख्यमंत्री डॉ. प्रमोद सावंत हांणी सांगलें.
अटलबिहारी वाजपेयी हांकां आर्गां ओंपचे खातीर विशेश कार्यवळीचें आयोजन सांखळेच्या रवींद्र भवनांत आयोजीत केल्लें. ह्या वेळार मुख्यमंत्री उलयताले.
राष्ट्र प्रथम ह्या तत्वाचेर चलपी भाजपाचो वावर युवा वर्गांत सदांच नवचेतना भरपाचें काम करता. सांखळी मतदारसंघांत लेगीत पोरणे खूब कार्यकर्ते आसात. अश्या कार्यकर्त्यांचो सन्मान जावप गरजेचें आसा. तांणी वाजपेयी हांचो आदर्श सांबाळटना नवी उर्जा मेळोवची. अटलबिहारी वाजपेयी हे कवी मनाचे प्रधानमंत्री आशिल्ले. तांणी युवा वर्गांत नवचेतना भरपाचें काम केलें, अशें मुख्यमंत्री डॉ. सावंत हांणी सांगलें.
भाजपाचो वावर खूब व्हड आसा. अटलबिहारी वाजपेयी हांणी देशा खातीर केल्लो वावर खूब व्हड आसा. ह्या वावराची म्हायती दरेका कार्यकर्त्याक मेळची हे खातीर अश्या कार्यावळींचें आयोजन सेगीत करतले, अशें भाजप प्रदेशाध्यक्ष दामू नायक हांणी कार्यकर्त्यांक मार्गदर्शन करतना सांगलें.
ह्या वेळार कारापूर सर्वण जिल्हो पंचायत वांगडी महेश सावंत, पाळी जिल्हो पंचायत वांगडी सुंदर नायक, गोपाळ सुर्लकार, स्वाती माईणकार, सुभाष मळीक, सांखळी भाजप अध्यक्ष रामा नायक हाजीर आशिल्ले.
हे कार्यावळींत राजाराम परब, अनंत गांवस, बंडोपंत सेटगे, लक्ष्मण नार्वेंकार, दामोदर भोमकार, शशिकांत नायक, दत्ताराम मांद्रेंकार, आनंद वेरेंकार ह्या पाळी मतदारसंघांतल्या भाजपाच्या पोरण्या कार्यकर्त्यांचो मुख्यमंत्री डॉ. सावंत हांचे हस्तुकीं खास भोवमान केलो.
सुत्रसंचालन संजय नायक हांणी केलें जाल्यार गोपाळ सुर्लकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
