भांगरभूंय | प्रतिनिधी
लोकशायेंत तरेकतरांचीं आंदोलनां करतात. खास करून विरोधी पक्ष. एक उलो मारलो काय वर- देड वरां भितर वावुरपी एकठांय करपाची तांक आशिल्ले पक्ष, संघटणां गोंयांत आसात. म्हारगाय, भ्रश्टाचार, भाशा, तिकेट सवलत, कारखान्याक विरोध, चड फी घेवपी शिक्षणीक संस्थांक विरोध… खूब आंदोलनां जाल्यांत, ती येसस्वीय जाल्यांत. मागण्यो पुराय जावच्यो म्हूण आंदोलनां करपीय लोक जावन गेल्यांत. शांततायेन, सामान्य लोकांक त्रास करिनासतना आंदोलन करपाचो हक्क आमकां संविधानान दिला. मात, बरींच आंदोलनां हिंसक जातात. जपानांत बुटाचे कंपनींत संप जाल्लो. तेन्ना मागण्यो मान्य जाय मेरेन कामगारांनी फक्त उजव्या पांयाचेच बूट तयार केले. असलीं आंदोलनां फक्त जपानांतूच जावपाचीं.
बावलें वा बावटो लासपाचें आंदोलन सगलेच करतात. निशेध करप हो ताचे फाटलो उद्देश आसता. पहेलगाम 22 एप्रीलाक आतंकवाद्यांनी 28 पर्यटकांक जिवेशीं मारले. फक्त दादल्यांक, तेंय बी धर्म विचारून. वयल्यान चलात आतां सांगात वचून तुमच्या सरकाराक अशींय उर्मटपणाची भाशा केली. घडणूक थळाचेर सुरक्षा नाशिल्ली, ताका लागून आतंकवाद्यांनी आपलें काम सादोवन सहज पळ काडलो. अजून ते मेळूंक नात. हाचे फाटल्यान पाकिस्तान आसा, असो आरोप जाला. तांकां जल्माची बुद्द शिकोवपाची घोशणा सरकारान केल्या. हत्येचे हे नीच घडणुके आड देशभरांत आंदोलनां जालीं. कांय जाणांनी मुस्लिमांचे दिकेन आंदोलनाची नाळ घुंवडायली. थोड्यांनी काश्मीरांत कोणेंच पर्यटनाक वच्चें न्हय, अशें वेगळें तोंडी आंदोलन केले. सोशल मिडियाचे मजतिनूय आतां आंदोलनां करपाक मेळटात. गोंयांत मेणवात मोर्चे, घोशणा आंदोलनां जालीं. आतां म्हापश्यां आनी काणकोणां पाकिस्तानी बावटो रस्त्याचेर काडपाचें निशेध आंदोलन जालां. ताचे वयल्यान वाद निर्माण जाला. अर्थांत सोशल मिडिया वयल्यान!
पाकिस्तान आनी धर्मांध बंडखोर, आतंकवादी हे आमच्या देशाचे दुस्मान. आमकां स्वतंत्राय मेळ्ळी तेन्ना पसून ते आमकां सतायत आसात. संबंद सुदारपाचे जायते यत्न जाले, पूण कांयच जाग्यार पडना. पाकिस्तानांतले कांय धर्मांध, आतंकवादी संघटणांचे तरणाटे भारतांत येवन हिंसाचार करीत आसात. तांकां पाकिस्तानी लश्कराची, सरकाराचीय भितरल्यान फूस आशिल्ल्याचेंय सिद्ध जालां. मुंबय जाल्लो हल्लो तर सगल्यांत भिरांकूळ आशिल्लो. आतां मेरेन देशाचे मालमत्तेचें लुकसाण तर जालांच, पूण सुरक्षेचेर अब्जांनी डाॅलरांचो खर्च करचो पडला. कितलेशेच मोलादीक जिवूय व्हगडायल्यात. ताची कल्पनाच केल्यार मेंदू गरगरता. तेन्ना लश्करान पाकिस्तानाचे दोके मोडूंक जाय. सामान्य नागरिकांनीय आपणाक जाता तसो निशेध करपाक जाय. नामोशी- गिरी जंक्शन आनी काणकोणां कृष्णा हाॅटेल आनी शिवाजी महाराज पुतळ्या लागसारच्या रस्त्या कडेन कोणे तरी रातचें पाकिस्तानाचे बावटे रंगल्यात. ताचे वयल्यान आतां भाजपा आनी काँग्रेसी मदीं पेटलां. सभापतींनूय काणकोण पुलिशेंत कागाळ केल्या. खरें म्हणल्यार बावटो रंगोवप्यांनी भर दिसाचें आंदोलन करून पाकिस्तानी बावटो पांयां पोंदा माड्डिलो, लाशिल्लो जाल्यार कोणूच ताका हरकत घेवचो नाशिल्लो. पुलिसांची आनी प्रशासनाची आंदोलना खातीर परवानगी तितलीं घेवची पडपाची. ह्या आंदोलनांत आपयनासतना लोक वांटेकार जावपाचे. निदान तन, मनान तेंको दिवपाचे. पूण हे बावटे रातच्या काळखांत कित्याक रंगयले तें कळना?
लोक, मोनजात, गाडयां पोंदां ते येवचे असो आंदोलकांचो उद्देश आसुये. भौशीक रस्त्याचेर, जाग्यांचेर बॅनर, बावटे लायतना कायदेशीर परवानगी घेवची पडटा. मात हांगा ती घेतिल्ली दिसना. एक बावटो शिवाजी महाराज पुतळ्या लागसारच्या रस्त्यार रंगयला. महाराजांच्या विरोधकांनी वा भारताच्या विरोधांत आशिल्ल्यांनी तो रंगयलो अशें भासोवपाचो बी अज्ञात आंदोलकांचो हेतू आशिल्लो? समजा तशेंच घडलां अशें समजून कोणे तिडकीन आनीक कितें केल्लें जाल्यार समाजांत तेढ निर्माण जावची नाशिल्ली? हे तीन- चार बावटे कोणे पाकिस्तान मोगीन बी रंगोवंक नात मूं? एकमेकांक तिडावन मजा पळोवपाची संवय कांय लोकांक आसता. पुलिसांनी आपल्या गुप्तहेर विभागा वरवीं, सीसीटीव्ही कॅमेऱ्याचे मजतीन ते रातीं नेमकें कोणें हे बावटे रंगयल्यात, ताचो तपास बेगोबेग करून ही देशद्रोही, समाजद्रोही कीड थंयचे थंय चिड्डुची. कारण फुडाराक ती घातक थारूं येता. गोंय अजून हे बाबतींत मुखेल प्रवाहांत येवंक ना. मिरवणुकेच्या वेळार गाडी थारावन डिजे वाजयलो, फोग मारलो, घोशणा दिल्यो म्हूण आमच्या म्हान देशांत दोन समाजां मदीं केस्तांवां जाल्यांत. असल्या अविचारी समाजविद्वाट्यां पसून शांती, भावचार आशिल्लें गोंय चार हात पयसूच दवरुया.
आरजी पक्षाक हल्ल्या फाटल्यान स्थलांतरीत आसूं येतात, अशें दिसता. तांणी तशें पत्रकार परिशदेंत सांगलां. ते नदरेनूय पुलिसांक तपास करचो पडटलो. रातच्या काळखांत पाकिस्तानी बावटो रंगोवपाचो हो प्रकार पाकिस्तानाचो मोग, विरोध काय समाजीक तेढ निर्माण करपाचो प्रकार हें उक्तडार येवप गरजेचें. दोशींक वाटावपाचो यत्न जावंक जायना. ताका कडक ख्यास्त दिवंक जाय. पाकिस्ताना आड निशेध आंदोलन करपाक बावटो रंगोवप्यान वा रंगोवप्यांनी हड्डे मुखार काडून भर दिसाचो शेंकड्यांनी लोकां मुखार पाकिस्तानाचो खर निशेध करपाचो, तांचो बावटो पांयांनी माड्डून, पिंजून लासपाचो. समेस्त गोंयकार तांची तुस्त, तोखणायूच करतले आशिल्ले….!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
