भांगरभूंय | प्रतिनिधी
‘हांव योगी आनी योगीच रावतलों…’ ही लीयन आसा उत्तर प्रदेशाचे मुख्यमंत्री योगी आदित्यनाथ हांचे येवपी बायोपिकाची. येवपा आशिल्ल्या चित्रपटाचें नांव आसा ‘अजेय : द अनटोल्ड स्टोरी ऑफ ए योगी’. निर्मात्यांनी हालींच डिजर जारी करून चित्रपटा विशीं म्हायती दिल्या.
फिल्म प्रॉडक्शन हावस सम्राट सिनेमॅटिक्सान टिजराक इंस्टाग्रामाचेर शॅर करतना कॅप्शनांत बरयलां, ‘तांणी सगळ्याचो त्याग केलो, पूण लोकांनी ताका आपलो केलो’. शॅर केल्ल्या व्हिडियोंत योगी आदित्यनाथाची जीण आनी बदल विशीं दाखयलां. तातूंत अध्यात्मीक आनी राजकी मार्गाक आकार दिवपी निर्णायक खिणांक लेगीत बारीकसाणीन दाखयलां. तातूंत तांचीं सुरवातीचीं वर्सां, नाथपंथी योगीच्या रुपांत संन्यास घेतले उपरांत तांचें निर्णय आनी एक राजकी फुडारी म्हूण तांची उदरगत ह्या टिजरांत दाखयल्या.
‘अजेय : द अनटोल्ड स्टोरी ऑफ ए योगी’ चित्रपट लेखक शांतनू गुप्ताचें पुस्तक ‘द माँक हू बिकेन चीफ मिनिस्टर : द डेफिनिटिव्ह बायोग्राफी ऑफ योगी आदित्यनाथ’ हाचेर आदारीत आसा. चित्रपटाच्या पयल्या टिजरांत ड्रामा, इमोशन्स, एक्शन आनी त्याग हांचें मिश्रण पळोवपाक मेळ्ळें. चित्रपटांत अभिनेतो अनंत जोशी, योगी आदित्यनाथ हांची भुमिका करतना दिसतलो. अनंत हाचे वांगडा चित्रपटांत परेश रावल, दिनेश लाल यादव ‘निरहुआ’, अजय मेंगी, पवन मल्होत्रा, गरिमा सिंह, राजेश खट्टर हांच्योय म्हत्वाच्यो भुमिका आसात.
चित्रपटा विशीं निर्माता रितू मेंगी हांणी सांगलें, योगी आदित्यनाथ हांचीं जीण आव्हानां, कठीण परिस्थिती आनी कितल्याश्याच परिवर्तनांनी भरलां. आमचो चित्रपट तांच्या प्रवासाक चित्रपटाच्या रुपांत आकर्शक पद्दतीन सादर करपा कातीर तयार आसा. तातूंत त्या मुख्य घडणुकांक मुखार हाडला, ज्यो तांचे जिणेंत खुबूच म्हत्वाच्यो आसात. ‘अजेय : द अनटोल्ड स्टोरी ऑफ ए योगी’ चित्रपटांत उत्कृश्ट कलाकार आसात, ते मनरिजवण करतना काणी सादर करतात. चित्रपटाच्या प्रदर्शना खातीर आमी खुबूच उत्सूक आसात.
चित्रपटाचें संगीत मीत ब्रदर्सान तयार केलां आनी ताची काणी दिलीप बच्चन झा तशेंच प्रियांका दुबे हांणी बरयल्या.
‘अजेय : द अनटोल्ड स्टोरी ऑफ ए योगी’चे दिग्दर्शक रवीन्द्र गौतम हांणी सांगलें, आमचो चित्रपट देशांतल्या युवकां खातीर प्रेरणा दिवपी आसा. तातूंत उत्तराखंडांतल्या एका गांवांतल्या सादारण मध्यम वर्गांतल्यान आयिल्ल्या भुरग्याक दाखयला, जो भारतांतल्या सगळ्यांत चड लोकसंख्या आशिल्ल्या राज्याचो (उत्तर प्रदेश) मुख्यमंत्री जाता.
‘अजेय : द अनटोल्ड स्टोरी ऑफ ए योगी’ चित्रपट हिंदी, तेलुगू, तामीळ, कन्नड आनी मल्याळम भाशांनी संवसारभर प्रदर्शीत जावपाक तयार आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
