भांगरभूंय | प्रतिनिधी
आयच्यान जोडणी तोडपाची कारवाय जातली सुरू
पणजी : अडचणीच्या सुवाते वेले वीज मिटर काडून ते सोयीचे सुवातेर हाडपाच्या नोटिशेक फक्त 35 टक्के वीज गिरायकांनी प्रतिसाद दिला. हाका लागून 65 टक्के गिरायकांचे मिटर घरा भितर वा अडचणीचे सुवातेर आसा. अडचणीचे सुवाते वेल्या 12 हजार वीज मिटरांचे स्थलांतरण वीज गिरायकांनी केलां. नोटीशे प्रमाण स्थलांतरणाची मुजत शुक्रारा सोंपिल्ल्यान फाल्यां शेनवारा सावन कारवाय सुरू जातली अशी म्हायती वीज खात्याचें अधिक्षक अभियंते मयूर हेदे हांणी दिली.
अडचणीचे सुवातेर 38 हजार घरगुती वीज मिटर आशिल्ल्याची म्हायती खात्या कडेन आसा. हाचे मदले 12 हजार मिटरांचें स्थलांतरण जालां. जांणी स्थलांतरण करूंक ना, तांची वीज जोडणी तोडपाची कारवाय सुरू जातली अशें अधिक्षक अभियंते मयूर हेदे हांणी सांगलें.
कांय जाणांचे वीज मिटर घरांत भितर आसात. मिटर रिडर बिलां खातीर रिडींग घेवपाक येता तेन्ना घर बंद आसता. हाका लागून तांकां रिडिंगा खातीर फावटी मारच्यो पडटात. कांय वेळार मिटर बरोच उंच आसता. हाका लागून रिडींग सारके घेवंक मेळना. हाका लागून वीज खात्यान मे म्हयन्यांत वीज मिटर स्थलांतरीत करपाची नोटीस गिरायकांक दिल्ली. मिटराचें स्थलांतरण करपा खातीर 6 म्हयन्यांची मुजत आयज 28 नोव्हेंबराक सोंपता. त्या, त्या विभागाचे अभियंते नोटीशे प्रमाण कारवाय सुरू करतले अशी म्हायती अधिक्षक अभियंते मयूर हेदे हांणी दिली.
हाचे पयली लेगीत खात्यान बरेच खेपो नोटीस दिल्या वा तांकां कळीत केलां. हाका लागून आतां कारवाय करपा बगर हेर पर्याय ना, अशें अभियंत्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
