अजून खूब चलपाचें आसा…

भांगरभूंय | प्रतिनिधी

प्रत्येकाचे जिणेंत म्हत्वाचे टप्पे आसतात. वाटचिरेच ते. मार्गाचे कुशीक अंतर दाखोवपी नीस. पिरायेचीं 18, 21 वर्सां हुपता तेन्ना तो पयलो वाटचिरो आसता. 21 व्या वर्सा भुरगो जाण्टो जाता, ताचे वयल्यो जबाबदाऱ्यो वाडटात. 50 वो वाडदीस होय एक टप्पो. विसरूंक जायना असो. अर्थांत जिणेंतलें एक वर्स कमी जालें, अशें मानपीय आसात. तरीय वाडदिसा नवे हावेस बाळगुपाक जाय, नवीं सपनां पळोवपाक जाय आनी तीं साकार करपाक नेटान वावुरपाक जाय. प्रामाणीकपणान यत्न केल्यार तातूंतली बरीचशीं सपनां पुराय जातातूच. गोंयचे तरणाटे मुख्यमंत्री दोतोर प्रमोद सावंत हांचो आयज 50 वो वाडदीस. जिवितांतलो एक म्हत्वाचो पांवडो तांणी आयज पूर्ण केलो. मनोहर पर्रीकार संवसाराक अंतरले आनी तांचे उपरांत पक्षश्रेश्ठींनी मुख्यमंत्रीपदाचो मुकूट तांकां घालो. ताची आस हेर कांय जाणांक अर्थांत आशिल्ली, पूण पक्षाचे निश्ठावान, संयमी वावुरपी, फुडारी म्हूण राज्य आनी देशांतल्या वरिश्ठांनी तांचेर विस्वास दाखयलो आनी तो तांणी सार्थ केलो. पक्षाचे ते तरणाटे मुख्यमंत्री. सगल्यांत चड काळ ह्या पदाचेर रावपाचें कर्तृत्वय रोखडेंच तांच्या वाट्याक येवपाचें आसा.
दोतोर रातदीस शांतपणान गोंय आनी गोंयकारां खातीर वावुरतात, हें वेगळें सांगपाची गरज ना. विशेश म्हणल्यार पदाचेर येत सावन तांणी सुटी घेवंक ना. आपले प्रजे खातीर झटपी अशे लोकप्रतिनिधी दुर्मीळूच. सोशल मिडिया आनी हेर माध्यमांतल्यान टिका जाता, पूण तिका आंगा वयलो मूस फाफुडचो तशी अळंग कुशीक काडची आसता. ही कला जाका सादली, तोच लोकप्रतिनिधी जनते खातीर कितें तरी करपाक पावतात. दोतोरुय टिका मनाक लावन घेनासतना उदरगतीच्यो आपल्यो कल्पना चालीक लायत आसात. श्रेश्ठी आनी आपल्या कांय वांगड्यांच्या सांगातान तांणी बरेच वाटचिरे हुपल्यात, येशाचे बावटे हुबयल्यात. मदीं कोरोनाचो वायट काळ आयलो. उद्देग, वेवसाय सगलेंच कोसळ्ळें. वयल्यान मनीसूय मरपाक लागले. पूण आबूज जायनासतना, भिवपाची गरज ना, अशें मनांत घोळयत दोतोर धाडसान कोरोनाक सामकार गेले आनी ल्हवू ल्हवू ह्या संकश्टांतल्यान गोंय, गोंयकाराक सुरक्षीत तडीक हाडले. कोरोनाक लागून कोसळिल्ली अर्थवेवस्था अजून सारकी निटायेर पडूंक ना. अजून खूब कितें करपाचें आसा.
दिवचल तालुक्यांतलो कोठंबी हो दोतोराचो गांव. कठीण परिस्थितीक सामकार वचत तांणी दोतोरकेचें शिक्षण घेतलें. जंय कोणूच सेवा दिवपाक तयार ना, त्या पाळी, वेळगें सारक्या वाठारांत तांणी सेवा दिली. तांचे बाबा संघाचे वावुरपी. गोंयांत भाजपाचें मुळावण घालपी फुडाऱ्यां कडेन तांची वळख आशिल्ली. तांकांच लागून दोतोर राजकारणांत आयले. भाजयुमोचे वावुरपी, नेहरू युवा केंद्र आनी हेर साबार संघटनांचेर काम करीत, पदां सांबाळीत ते एक- एक सोंपण वयर चडत ह्या पदाचेर पावल्यात. तांचे आदर्श, आदले मुख्यमंत्री मनोहर पर्रीकार हांणी तांकां राजकारणांत हाडले…. आनी तांची ही निवड चुकूंक नाशिल्ली, हें दो. सावंत हांणी आपल्या कर्तृत्वान सिद्ध केलां.
प्रत्येक मनशाक कसलें तरी पिशें आसपाक जाय. तेंच ताका येशाचो मार्ग दाखयता. जावं तें मागीर कलेचें मळ, समाजसेवेचें वा राजकारणाचें. गोंयचे तरणाटे नोकरे फाटल्यान धांवनासतना स्वताच्या पांयांचेर उबे रावचे, आपले भितरले कुशळटायेक तांणी रोजगाराचें रुप दिवचें, हे खातीर दोतोरान स्वयंपूर्ण गोंय ही मोहीम चालीक लायली. ती तांचो ध्यास म्हणल्यार जाता. फक्त रोजगारूच न्हय, तर नुस्तें, भाजी, फळां, खाणां- जेवणां आनी हेर जिनसांतूय गोंय स्वयंपूर्ण जावचें, हे खातीर ते घाम गळयतात. कोरोना काळांत ह्या मळांचेर जायते तरणाटे वावुरताले. ही उमेद अजूनय आसा, पूण तरणाट्यांचो आंकडो देंवला. दुसऱ्यांगेर नोकरी करचे परस स्वताच्या पांयांचेर उबे रावप केन्नाय बरेंच. सध्या गोंय सरकारा वतीन तरणाटे स्वावलंबी जावचे म्हूण सगलींच खातीं वावुरतात आनी हाचें स्रय दो. प्रमोद सावंत हांचे धडपडीक वता, हें विरोधकांक पसून मान्य करचें पडटलें. शिक्षण, उद्देग मळाचीय दोतोराक आवड आसा. तांच्या काळांत जुवारी सावन मोपा मेरेनचीं कामां जाल्यांत. बरींच जावपाचे वाटेर आसात. राॅबर्ट फ्राॅस्टाची एक कविता आसा, अटंग्या रानांत दोन रस्ते वताले…. चड वापरूंक नाशिल्लो तो हांवें वेंचलो आनी चलत रावलों. दोतोरान माडिल्ल्यो वांटो घे नासतना नव्यो वांटो तयार करपाचो यत्न केला आनी तातूंत तांकां यशूय मेळ्ळां. अजून खूब चलपाचें आसा…. तांकां वाडदिसाचीं परबीं.