अजीत कडकडे हांणी मानले मुख्यमंत्री आनी गावडे हांचे उपकार
भांगरभूंय | प्रतिनिधी
पणजी : नामनेचे गायक पं. अजीतकुमार कडकडे हांकां मंगळारा गोंयचो सर्वोच्च नागरी सन्मान ‘गोमंत विभूशण’ भेटयलो. शास्त्रीय आनी उपशास्त्रीय संगीत मळावेल्या तांच्या दिर्घ योगदानाची दखल घेवन राज्य सरकारान तांचो भोवमान केलो.
स्वीकृती भाशणांत कडकडे हांणी म्हणलें, मुंबय ही कर्मभूंय जरी आसली तरी गोंय म्हण जल्मभूंय. हाका लागून म्हज्याच राज्या कडल्यान मेळिल्लो हो भोवमान आनीक मोलादीक आसा. तशेंच तांणी मुखार मुख्यमंत्री डॉ. प्रमोद सावंत, कला आनी संस्कृती संचालक सगुण वेळीप, आनी गोविंद गावडे हांचे उपकार मानले.
कडकडेंच्या ह्या भाशणा उपरांत मुख्यमंत्री डॉ. सावंत हांचें भाशण जालें. तांणी म्हणलें, हो पुरस्कार खंयच्याच मंत्र्याच्या निर्णयान दिनात. ताचे खातीर साहित्य, कला आनी संस्कृती मळावेल्या जाणकारांची समिती नियुक्त केल्या. निमाणी निवड ही समितीच करता. तांणी हजर आशिल्ल्यांक समिती खातीर ताळयो वाजोवपाचो उलोय मारलो.
सुवाळ्याक गोविंद गावडे हजर रावले
मंत्रिपदावेल्यान काडले उपरांत पयलेच फावट मुख्यमंत्री डॉ. प्रमोद सावंत आनी आमदार गोविंद गावडे एकेच माचयेर हजर आशिल्ले. आमदार गावडे हांणी मुख्यमंत्री डॉ. प्रमोद सावंत हांकां शॅकहॅण्ड केलो; मात त्या दोगांयनी एकामेकां कडेन पळोवंक नाशिल्ले सारकें केलें, हें खुबश्या जाणांच्या नदरेंतल्यान सुटूंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
