भांगरभूंय | प्रतिनिधी
मुंबय: महाराष्ट्राचे उपमुख्यमंत्री अजित पवार हांकां विमान अपघातांत मरण आयलें. तांचे वांगडा विमानांत आशिल्ले पर्सनल सिक्युरिटी ऑफिसर हेड काॅस्टेबल विदिप जाधव, पायलट कॅप्टन सुमित कपूर, कॅप्टन शांभवी पाठक आनी फ्लायट अटेंडंट पिंकी माळी हांकांय मरण आयलें.
आतां अपघाता पयलींची काणी मुखार आयल्या. विमान कोसळचे पयलीं कॅप्टन शांभवी पाठक हांचे निमाणे शब्द अशे आशिल्ले, ‘ओह शिट…ओह शिट.’ आतां मेरेन मेळिल्ले म्हायती प्रमाण, विमानाची धुरा कॅप्टन सुमित कपूर आनी शांभवी पाठक हांच्या हातांत आशिल्ली.
सकाळीं धुक्याक लागून दृश्यमानता उणी आशिल्ली. वैमानिकांनी बारामती विमानतळाच्या रनवे ११ चेर देंवपाचो यत्न केलो. मात तांकां रनवे दिसूंक ना. वैमानिकांनी विमान परत वयर घेतलें. कांय वेळान परत देंवपाचो यत्न केलो. ह्या वेळार विमान रनवेचे दिकेन निसरलें. मात रनवेला स्पर्श करचे पयलींच तें उमथलें आनी जमनीर आदळ्ळें.
बारामती विमानतळा लागसार गांवगिरो वाठार आसा. हांगा खुबश्या लोकांनी अपघाता आदीं विमान पळयिल्लें. एका प्रत्यक्षदर्शीन सांगलें, विमान धांवपट्टी लागसार पावोवचे पयलीं सुमार १०० फूट पयलींच कोसळ्ळें. जेन्ना विमान सकयल देंवतालें, तेन्नाच अपघात जातलो अशें दिसतालें आनी तशेंच जालें.
अपघाता वेळार थंय हाजीर आशिल्ल्या लोकांनी सांगिल्ले प्रमाण, धांवपट्टीर आदळ्ळे उपरांत विमानांत स्फोट जालो आनी उजो लागलो. उपरांत आनीक ४-५ स्फोट जाले. उपरांत थळावे लोक घडणुके सुवातेर धांवले. लोकांनी विमानांत आशिल्ल्या लोकांक भायर काडपाचो यत्न केलो. मात उजो इतलो भिरांकूळ आशिल्लो, तांकां वाटोवपाक लागीं वचप शक्य जावंक ना.
गावच्या लोकांनी सांगलें, विमान पयलीं गांवा वेल्यान गेलें. उपरांत गांवां वटेन येतना दिसलें. उपरांत धावपट्टीचेर वचून उमथले आनी जमनीक आदळ्ळें. स्फोटा उपरांत विमानाचे कुडके उडून आमच्या घरा मेरेन पावले.
विमानांतल्या प्रवाशांचीं नांवां
१. अजित पवार २. मुंबय पीएसओ विदीप जाधव ३. पायलट कॅप्टन सुमित कपूर ४. कॅप्टन शांभवी पाठक ५. पिंकी माळी, फ्लायट अटेंडंट
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
