भांगरभूंय | प्रतिनिधी
पणजी : मुळाव्यो सुविधा तयार करपा सयत सरकारान कला आनी साहित्याक उर्बा दिवपा खातीर तरेकवार येवजण्यो सुरू केल्या. अजित कडकडे सारके कलाकार गोंयांत तयार जावचें, म्हूण सरकाराचे यत्न आसात. विद्यालयानी संगीत आनी नाटकाचे शिक्षक नेमपी गोंय हे पयले राज्य आसा, अशें मुख्यमंत्री डॉ. प्रमोद सावंत हांणी सांगलें.
नामनेचे शास्त्रीय गायक आनी गोंयचे सुपूत अजितकुमार कडकडे हांचो गोमंत विभूशण पुरस्कार भेटोवन भोवमान केलो. कला अकादमींत खाशेल्या कार्यावळींत मुख्यमंत्री डॉ. प्रमोद सावंत हाणी हो प्रतिश्ठेचो पुरस्कार तांकां भेटयलो. कार्यावळीक समाज कल्याण खात्याचे मंत्री सुभाष फळदेसाय, राज्यसभा खासदार सदानंद शेट तानावडे, आमदार गोविंद गावडे, आमदार डॉ. चंद्रकांत शेट्ये, आमदार कृष्णा साळकार, आमदार संकल्प आमोणकार, कला आनी संस्कृती खात्याचे सचीव सुनील अंचिपाका, कला आनी संस्कृती खात्याचे संचालक सगुण वेळीप, अजितकुमार कडकडे हांची घरकान्न छाया कडकडे हाजीर आशिल्ली.
कलाकार जावपा खातीर जिद्द, चिकाटी आनी मेहनत घेवपाची तयारी आसपाक जाय. अजित कडकडे हांच्यो संगिताच्याे मैफली भारतातूच न्हय जाल्यार दुबय, युरोपांत जाल्या. गोंया परस महाराष्ट्र आनी हेर वाठारांत ते फामाद आसात. तरणाट्यांनी तांचे कडल्यान उर्बा घेवन कलेत नामनां मेळोवपाची गरज आसा, अशें मुख्यमंत्री डॉ. प्रमोद सावंत हांणी म्हणलें. रोख 5 लाख रुपया, मानपत्र अशें या पुरस्काराचे स्वरूप आसा.
————————–
पुरस्कार अभिषेकी आनी हेर गुरूंक समर्पीत करता
गोमंत विभूशण पुरस्कार आपूण म्हजें गुरू अभिषेकीबुवा, मांडये आनी हेर गुरूंक समर्पीत करता. संगिताचे सगळे रसीक, गुरूजन आनी तुमकां सगळ्यांक लागून म्हजो संगितांतलो प्रवास सुरू आसा. हो प्रवास अजून पुराय जावंक ना. पिराचेच्या 18 व्या वर्सा मुंबयत आपूण पं. अभिषेकी बुवां कडेन शिकपाक गेलो तेन्ना ते आपणाक शिकोवपाक तयार नाशिल्ले. पयलीं दोन वर्सां अापणाक तांणी कितेंच शिकोवंक ना. हांव गायक जातलो, असो म्हजे भितरलो ईश्वरी आवाज म्हाका सांगतालो. अभिषेकी बुवां कडेन हांव शिस्त तशेंच हेर म्हत्वाच्यो गजाली शिकलो. गोंय ही म्हजी जल्मभूंय आसली तरी महाराष्ट्र ही कर्मभूंय आसा, अशें अजित कडकडे हांणी सांगलें.
ह्या वेळार खासदार सदानंद शेट तानावडे आनी मंत्री सुभाष फळदेसाय हांची उलोवपां जाली. डॉ. अजय वैद्य हांणी मानपत्राचे वाचन केले. ह्या वेळार अजित कडकडे हांची घरकान्न छाया कडकडे हांची ओटी भरून भोवमान केलो. कार्यावळीच्या सुरवेक अजित कडकडे हांच्या जिणेचेर आदारीत म्हायतीपटाचे प्रदर्शन जालें. हाचे पयली अजित कडकडे हांच्या चित्रप्रदर्शनाचे आर्ट गॅलरींत उक्तावण जालें. कला आनी संस्कृती खात्याचे संचालक सगुण वेळीप हांणी येवकाराचे उलोवप केले. सिद्धी उपाध्ये हिणे सूत्रनिवेदन केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
