भांगरभूंय | प्रतिनिधी
खबरां संस्था
मुंबयः अजिंक्य रहाणेची वर्ल्ड टॅस्ट चॅम्पियनशीप फायनली खातीर (डब्ल्यूटीसी) भारतीय पंगडांत निवड जाल्या. आयपीएलांतली सद्याची रहाणेची कामगिरी जबरदस्त जाल्ल्या. ते खातीर ताची भारतीय पंगडांत निवड जाल्या अशें जायते जाणाचें मत आसा. मात टी इंडियाचो आदलो मुख्य कोच रवी शास्त्री मात ताचे कडेन सहमत ना. रहाणेन देशांतर्गत क्रिकेटीन बरी कामगिरी करून दाखयल्ल्यान ताचें फळ ताका मेळ्ळां. अशें शास्त्रीक दिसता.
रहाणेन आयपीएलांत आतां मेरन स डावांत 44.80चे सरासरीन 224 धांवड्यो केल्यात. ताची भारतीय पंगडांत निवड जाली तेन्ना आयपीएलांतले कामगिरीच्या आदारान ताची डब्ल्यूटीसी फायनली खातीर निवड जाल्ल्याची चर्चा आशिल्ली. रहाणेक भारतीय पंगडांत सुवात मेळ्ळी हाची म्हाका खोस जाल्या. आयपीएलांत तो बरी कामगिरी करता, म्हत्वाचें म्हणल्यार ताचे कडेन खूब अणभव आसा अशें शास्त्रीन सांगलें.
आयपीएलांतले कामगिरी वयल्यान रहाणेची भारतीय पंगडांत निवड जाली अशें म्हणप समा न्हय. रहाणे पयले श्रेणीच्यो मॅची खेळटना ताचे कामगिरी कोण पळयली नास्तली. ना जाल्यार आयपीएलाक लागून तो भारतीय पंगडांत आयला अशें ते म्हणपाचे नाशिल्ले. रणजी करंड क्रिकेट सर्तींत ताणे 57.63चे सरासरीन 634 धांवड्यो केल्यो आनी तातूंत दोन शेंकडे आनी एक अर्द शेंकडो आसा. हेच कामगिरीन ताका भारतीय पंगडांत सुवात मेळोवन दिली अशे शास्त्रीचें म्हणणे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
