भांगरभूंय | प्रतिनिधी
संवसारीक टॅस्ट वस्तादपण सर्तीचे फायनली खातीर भारतान आपल्या 15 वांगड्यांच्या पंगडाची घोशणा केली. मुंबयच्या अजिंक्य रहाणेचें पंगडांत पुनरागमन जालां. 15 म्हयन्यांनी ताका पंगडांत सुवात मेळ्ळी. रहाणेन आपली निमाणी मॅच 11 जानेवारी 2022त दक्षीण आफ्रिके आड खेळिल्लो. निवड समितीन पंगडांत स तज्ञ बॅट्सनांचो आस्पाव केला. हातूंत सुर्यकुमार यादवाचें नांव ना.
संवसारीक टॅस्ट वस्तादपण सर्तीची फायनल 7 ते 11 जून मजगतीं इंग्लंडाच्या ओव्हल मैदानाचेर भारत आनी ऑस्ट्रेलिया ह्या पंगडां मदीं जातली. भारत सेगीत दुसरे खेपे फायनलींत पावला. फाटले खेपे ताका न्युझिलॅण्डा कडल्यान 8 विकेटींनी हार घेवची पडिल्ली.
रहाणेन अंदूंचे आयपीएलांत जबरदस्त बॅटींग केल्या. ताणें आक्रमक बॅटींग करतना अजून मेरेन पांच मॅचींतल्यान 52.25चे सरासरीन 209 धांवड्यो केल्यात. ताची स्ट्रायक रेट 199.05 आसा.
कोलकाता नायट रायडर्सा आड रहाणेन 29 बॉलांनी 71 धांवड्यो केल्ल्यो. मुंबय इंडियन्सा आड चेन्नय सुपरकिंग्स संकश्टांत सांपडिल्लो त्या वेळार रहाणेन 27 बॉलांनी 61 धांवड्यो करून पंगडाक जैत मेळोवन दिवपाक म्हत्वाचें योगदान दिल्लें. हाचे खेरीत रॉयल चॅलेंजर्स बंगळुरू आड ताणें 37 आनी राजस्थान रॉयल्सा आड 31 धांवड्यांची खेळी केल्ली.
रहाणे अजून मेरेन 82 टॅस्टी खेळ्ळा. 38.52चे सरासरीन 4931 धांवड्यो केल्यात. हातूंत 12 शेंकड्यांचो आनी 25 अर्द शेंकड्यांचो आस्पाव आसा. 188 ताचो सर्वोच्च स्कोर आसा.
पंगड असोः रोहित शर्मा (मुखेली), शुभमन गिल, लोकेश राहुल, चेतेश्वर पुजारा, विराट कोहली, अजिंक्य रहाणे, केएस भरत, रवींद्र जडेजा, अक्षर पटेल, आर अश्विन, मोहम्मद सिराज, मोहम्मद शमी, शार्दुल ठाकूर, उमेश यादव आनी जयदेव उनाडकट.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
