भांगरभूंय | प्रतिनिधी
वॅस्ट इंडिजाचे भोंवडेर वचपी भारताच्या टॅस्ट पंगडाचें फुडारपण अजिंक्य रहाणे करपाक शकता. वॅस्ट इंडिजाचे भोंवडे खातीर भारताच्या पंगडाची घोशणा 27 जूनाक जावपाची शक्यताय आसा. भारत हे भोंवडेर दोन टॅस्टी, तीन वन डे आनी पांच टी-20 मॅची खेळटलो. ताची सुरवात 12 जुलया सावन डॉमिनिकांत जावपी टॅस्ट मॅची वरवीं जातली. दुसरी मॅच त्रिनिदाद हांगा जातली.
सदचो मुखेली रोहित शर्माक विसव दिवपाची शक्यताय आसा. सेगीत क्रिकेट खेळून रोहित थकला. ताका लागून वॅस्ट इंडिजाचे भोंवडे खातीर ताका विसव दिवपा विशीं निवड समिती विचार करता. हे विशीं निवड समितीचे वांगडी रोहित शर्मा कडेन चर्चा करून निमाणो निर्णय घेतली.
रोहिताक विसव दिल्या उपरांत हालींच पंगडांत पुनरागमन करपी रहाणेची मुखेली म्हणून निवड करुये.
हाचे आदीं रहाणेन भारताचें फुडारपण केलां, तशेंच तो उप मुखेली लेगीत आशिल्लो. पूण, बाबत फॉर्माक लागून ताका पंगडांतल्यान भायर बसोवपाचो निर्णय घेतलो. ताणें हालींच सोंपिल्ले संवसारीक टॅस्ट वस्तादपण सर्तीचे फायनलींत पुनरागमन केल्लें. ताणें पयल्या डावांत 89 धांवड्यांची खेळी करून पंगडाक फॉलोऑना पसून वाटायिल्लो, तशेंच दुसऱ्या डावांत 43 धांवड्यो केल्ल्यो.
मजगतीं, चेतेश्वर पुजारा सध्या फॉर्मांत ना. वॅस्ट इंडिजाचे भोंवडे खातीर ताची निवड जातली काय ना हे विशीं अजून कांयच स्पश्ट ना. पूण, रोहित आनी विराट कोहली हांकां विसव दिलो जाल्यार निवड समितीन पुजाराक आनीक एक संद दिवपाक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
