भांगरभूंय | प्रतिनिधी
4 दिसांची पुलीस कोठी म्हापशेंः हडफडेंच्या बर्च क्लब उजो अपघात प्रकरणांत क्लबाचे धनी दुबावीत आरोपी अजय गुप्ता हाका आनीक 4 दीस पुलीस कोठींत दवरपाचो आदेश म्हापशें न्यायालयान दिला. जाल्यार 4 दुबावितांक 14 दीस न्यायालयीन कोठींत दवरपाचो आदेश दिला. तातूंतल्या तिगां जाणांच्या जामीन अर्जाचेर 22 तारखेक निर्णय जातलो.
फाटीच्या दुखण्याक लागून गुप्ता हाका गादी दिवपाचे निर्देश न्यायालयान पुलिसांक दिले. तशेंच अजय गुप्ता आनी भारत सिंग कोहली हांच्या जामीन अर्जाचेर 20 डिसेंबराक म्हापशें अतिरिक्त जिल्लो न्यायालयांत सुनावणी जातली.
ह्या प्रकरणांत हणजूण पुलिसांनी अटक केल्ल्या विवेक सिंग, प्रियंशु ठाकुर आनी राजवीर सिंघनिया हांच्या जामीन अर्जाचेर बिरेस्तारा 17 तारखेक पुराय दीस म्हापशें अतिरिक्त जिल्लो सत्र न्यायालयांत युक्तीवाद जालो. अर्जदार आनी वादी तशेंच हस्तक्षेप करपी पक्षान खर युक्तीवाद घालो आनी जायत्या प्रस्नांचेर न्यायालयाचें लक्ष ओडून घेतलें. सांजवेळा 7 वरांचे सुमाराक युक्तीवाद पुराय जालो. उपरांत न्यायालयान हो निकाल 22 तारखे मेरेन राखून दवरलो.
क्लबांत प्रवेश करपाक एकूच मार्ग आसा आनी तोय अशीर आसा असो युक्तिवाद सरकारी वकिलांनी केलो. दुसरे वटेन कुलूप लायिल्लें. घडणुकेच्या वेळार 150 पर्यटक क्लबांत आशिल्ले. जें तांकी परस चड आशिल्लें. उजो लागले बरोबर सगले आपलो जीव वाटावपा खातीर धांवले. पूण अशीर मार्गाक लागून तांकां भायर सरूंक मेळनाशिल्ल्यान मरण आयिल्ल्या कर्मचाऱ्यांनी आनी पर्यटकांनी सुरक्षे खातीर क्लबाच्या तळमजल्यार आलाशिरो घेतलो. पूण थंय व्हेंटिलेशन वा पळून वचपाची सुविधा नाशिल्ल्यान ह्या निश्पाप लोकांचो जीव गेलो.
घडणुकेच्या दिसा दुबावीत अर्जदार क्लबांत हाजीर आशिल्लो. दुबावीत आपूण फकत क्लबांत वेवस्थापक म्हणून काम करतालो अशें सांगून आपली जापसालदारकी न्हयकारपाक शकना. अपघाताच्या वेळार तिगांय मदल्या खंयच्याच मनशान क्लबांत आडखळून उरिल्ल्या लोकांक वाचवपाचो यत्न केलो ना. तांकां मात्शें खरचटूंक वा जखम लेगीत जावंक ना. क्लबांत उजो पालोवपाची सुरक्षीतताय ना हाची तांकां पुराय खबर आशिल्ली. देखून इव्हेंट कंपनीन उजो लागपाक शकता अशे फटाके वापरचे न्हय ही तांची जापसालदारकी आशिल्ली.
ह्या गुन्यांवाची गंभीरताय खूब व्हड आसा. ह्या अपघातांत 25 निरपराधी लोकांक मरण आयलें. सध्या पुलीस चवकशी प्राथमीक पांवड्यार आसा, दुबावीत गोंय भायर आशिल्ल्यान पळून वचूंक शकतात वा पुराव्यां कडेन छेडछाड करपाक शकतात. देखून तांचो जामीन अर्ज न्हयकारचो असो युक्तिवाद सरकारी वकील जेनिफर सांतामारिया हांणी केला.
मजगतीं, ह्या अपघातांत भावना जोशीचो घोव आनी दिल्लींतल्या तीन भयणीं सयत चार जाणांक मरण आयलां. वयल्या तिगांयच्या जामीन अर्जांत हस्तक्षेपाचो अर्ज दाखल करपी पिडेस्ताच्या कुटुंबान अॅड. विष्णु जोशी, पिडेस्ताच्या कुटुंबाची बाजू मांडली आनी जामिनाक खर विरोध केलो.
अर्जदारां वतीन युक्तीवाद करतना अॅड. विनायक पाोरोब हांणी म्हणलें, गोंय पुलिसांनी राजवीर सिंघनिया (बार मॅनेजर), विवेक सिंग (जनरल मॅनेजर) आनी प्रियंशु ठाकुर (गेट मॅनेजर) हांकां कसलेंच कारण नासतना अटक केल्या. क्लबांतल्या उज्याच्या अपघातांत ह्या तिगांय मदलो कोणूच थेट संबंदीत ना. पुलिसांचे सगळे आरोप घाळपणाचे आसात. क्लबाच्या उजो पालोवपी सुरक्षेच्या वेवस्थेक बार मॅनेजराक कसो जापसालदार धरूं येता? विवेक सिंग सुटयेर आशिल्लो. तो आपल्या बायले वांगडा हनीमून मनोवपाक गोंयांत आयिल्लो. घडणुकेच्या दिसा क्लबांत जाल्ल्या अपघाताची म्हायती मेळ्ळे बरोबर तो थंय मजत करपाक गेलो. प्रियंशु ठाकुर हो गेट मॅनेजर आसून तो सोयऱ्यांक येवकार दिवपा खातीर प्रवेशदाराचेर काम करतालो. देखून क्लबाची जापसालदारकी ताका नाशिल्ली. ते तिगूय सादारण कर्मचारी आशिल्ल्यान अपघाताक तांकां जापसालदार धरप कायद्याक धरून ना अशें पोरोब हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
